Argentina prezidenti ABŞ-nin Venesuela planını dəstəkləyib

Poliqon xəbər verir ki, Argentina prezidenti Xavyer Miley ABŞ administrasiyasının Venesuela ilə bağlı planını “tamamilə uyğun və məntiqli şəkildə qurulmuş” strategiya adlandırıb. Bloomberg agentliyinin məlumatına görə, argentinalı lider Vaşinqtonun yanaşmasının ölkəni dərin böhrandan çıxarmaq üçün ardıcıl və real mərhələlərə əsaslandığını bildirib.

Mileynin sözlərinə görə, bu strategiya Venesuelada mövcud böhranın mərhələli şəkildə aradan qaldırılmasını nəzərdə tutur. Planın məntiqinə əsasən, ilk mərhələdə ölkədə ümumi vəziyyətin sabitləşdirilməsi həyata keçirilməlidir. Bundan sonra iqtisadiyyatın və dövlət institutlarının bərpası gündəmə gəlir və yalnız bu proseslərdən sonra demokratik idarəetməyə keçid mümkün ola bilər.

Argentina prezidenti vurğulayıb ki, hazırkı şəraitdə məhz sabitləşmə əsas və qaçılmaz addımdır. Onun fikrincə, dərin siyasi və iqtisadi böhran yaşayan ölkələrdə demokratik institutların formalaşdırılması yalnız ilkin sabitlik təmin edildikdən sonra real nəticə verə bilər.

“Bunu başqa cür etmək mümkün deyil: sabitləşmə məhz bu ardıcıllıqla baş verməlidir”, – deyə Xavyer Miley Vaşinqtonun təklif etdiyi addımların məntiqi ardıcıllığını dəstəklədiyini bildirib.

Bloomberg qeyd edir ki, Mileynin bu mövqeyi Latın Amerikası regionunda Venesuela böhranına yanaşmaların müxtəlifliyini bir daha ortaya qoyur. Ekspertlərin fikrincə, Argentina prezidentinin ABŞ planına açıq dəstəyi Vaşinqtonun regionda diplomatik təşəbbüslərinə əlavə siyasi çəki qazandıra bilər.

Poliqon.info