İran İsveç vətəndaşını edam edib - Stokholm səfiri XİN-ə çağırıb

İran çərşənbə günü İsveç vətəndaşını edam edib, bunun ardınca Stokholm İran səfirini Xarici İşlər Nazirliyinə çağıraraq bu addımı qəti şəkildə pisləyib.

Poliqon xəbər verir ki, bu barədə İsveçin xarici işlər naziri Mariya Malmer Stenerqard məlumat yayıb.

Nazirin sözlərinə görə, adı açıqlanmayan şəxs ötən ilin iyun ayında İranda saxlanılıb. İsveç tərəfi onun işi ilə bağlı müxtəlif səviyyələrdə İran rəsmiləri ilə dəfələrlə danışıqlar aparıb və məsələni gündəmdə saxlayıb.

Mariya Malmer Stenerqard bildirib ki, ölüm cəzası “qeyri-insani, qəddar və geri dönməz cəza növüdür” və İsveç bu praktikanı bütün hallarda qətiyyətlə rədd edir. O vurğulayıb ki, İsveç Avropa İttifaqı ilə birlikdə ölüm hökmünün tətbiqinə qarşı çıxır.

Qeyd olunur ki, bu hadisə 28 fevral tarixindən etibarən ABŞ və İsrailin İrana qarşı həyata keçirdiyi zərbələrdən sonra qeydə alınan ilk edam faktıdır. Bu isə regionda artan gərginlik fonunda beynəlxalq reaksiyaların daha da sərtləşməsinə səbəb ola bilər.

Analitiklər hesab edirlər ki, bu addım İran ilə Avropa ölkələri arasında diplomatik münasibətlərin daha da gərginləşməsinə gətirib çıxara bilər və tərəflər arasında qarşılıqlı ittihamların artmasına səbəb ola bilər.

Poliqon.info