ABŞ Uilanın bacısını Lavrovun sədrlik edəcəyi iclasa çağırdı, Zaxarova “piar kampaniyasıdır” dedi...
“Rusiyada casusluq ittihamı ilə mühakimə olunan ABŞ vətəndaşı Pol Uilanın bacısının Rusiyanın xarici işlər naziri Sergey Lavrovun sədrliyi ilə keçiriləcək BMT Təhlükəsizlik Şurasının iclasına dəvət edilməsi Dövlət Departamentinin piar kampaniyasından başqa bir şey deyil”.
Poliqon TASS-a istinadən xəbər verir ki, bunu Rusiya Xarici İşlər Nazirliyinin sözçüsü Mariya Zaxarova deyib.
“Nəzərinizə çatdırım ki, bu, ölkəmizdə casusluq ittihamı ilə məhkum olunmuş, cinayət başında tutulan şəxsdir. Həmin kadrlar bütün dünyanı dolaşıb”, deyə Zaxarova qeyd edib.
Qeyd edək ki, 2018-ci il dekabrın 28-də ABŞ, Böyük Britaniya, Kanada və İrlandiya vətəndaşlığına malik olan Pol Uilan casusluq iddiası ilə Moskvadakı “Metropol” otelində Rusiya Federal Təhlükəsizlik Xidməti (FTX) tərəfindən saxlanılıb.
FTX ona qarşı Rusiya Cinayət Məcəlləsinin 276-cı maddəsi ilə cinayət işi açıb. 15 iyun 2020-ci ildə Moskva Şəhər Məhkəməsi Pol Uilanı Rusiyaya qarşı casusluqda təqsirli bilib və onun 16 il ciddi rejimli həbsxanada cəza çəkməsinə qərar verib.
Poliqon.info