Ukrayna hökuməti səfərbərliklə bağlı qanun layihəsini beynəlxalq standartlara uyğun hesab etməyib

Qanun layihəsinin bəzi müddəalarının Ukrayna Konstitusiyanın normalarına, insan haqları ilə bağlı beynəlxalq standartlara uyğun olmadığı müəyyən edilib.

Bunu "Report"un Şərqi Avropa bürosuna açıqlamasında Ukrayna Prezidentinin xüsusi nümayəndəsi, Ukrayna Ali Radasının Milli Təhlükəsizlik, Müdafiə və Kəşfiyyat Komitəsinin Dövlət Təhlükəsizliyi və Müdafiə Alt Komitəsinin sədri Fyodor Venislavskiy bildirib.

Ötən gün Ukraynanın müdafiə naziri Rustem Umerov yeni qanun layihəsinin hazır olduğunu bildirib. Qeyd edib ki, əsas məsələlərdən biri sosial ədalətin təmin olunmasıdır: “Hərbi mükəlləfiyyətli Ukrayna vətəndaşlarının böyük bir hissəsi Ukraynanı tərk ediblər. Onlar həmçinin konsulluqda hərbi xidmət üçün qeydiyyatdan keçməlidirlər. Bu, artıq mövcud qanunvericilikdə nəzərdə tutulub”.

R.Umerov deyib ki, onlar öz məlumatlarını yeniləməlidirlər: “Gələcəkdə biz də mövcud qanunvericiliyə uyğun qərarlar verəcəyik. Xaricdən çağırış yaşına çatan bütün Ukrayna vətəndaşlarının geri qayıtmasını təmin etmək əlbəttə ki, asan olmayacaq. Amma buna baxmayaraq, biz çalışırıq ki, bu vətəndaşlar öz vətənlərini müdafiə etmək öhdəliyini yerinə yetirsinlər”.

Poliqon.info