Tramp FTB direktoru Kaş Pateli vəzifədən uzaqlaşdıra bilər

Poliqon xəbər verir ki, ABŞ prezidenti Donald Tramp yaxın aylarda Federal Təhqiqat Bürosunun direktoru Kaş Pateli vəzifədən uzaqlaşdıra bilər. Bu barədə MSNBC telekanalı administrasiyaya yaxın mənbələrə istinadən məlumat yayıb.

Mənbələrin sözlərinə görə, Tramp və onun yaxın komandası Patelin son vaxtlar mətbuatda çıxan tənqidi materiallara səbəb olan davranışlarından narazıdır. Xüsusilə onun FTB resurslarından şəxsi məqsədlər üçün istifadə etməsi, sevgilisinə təhlükəsizlik xidməti ayrılması, eləcə də xidməti təyyarədən şəxsi səfərlər üçün istifadə etməsi administrasiyada ciddi narahatlıq doğurub. Bundan başqa, Patelin prezidentə yaxın bəzi fiqurlarla gərgin münasibətləri də vəziyyəti ağırlaşdıran amillər kimi göstərilir.

MSNBC-nin məlumatına görə, Patelin yerinə mümkün namizəd kimi FTB-nin yüksək rütbəli rəsmisi Endryu Beyli nəzərdən keçirilir. Hazırda məsələ rəsmi qərar mərhələsində olmasa da, bu istiqamətdə daxili müzakirələrin getdiyi bildirilir.

Ağ Ev isə yayılan iddiaları yumşaltmağa çalışıb. Administrasiya sözçüsü Abigeyl Cekson bildirib ki, FTB direktoru Patel prezidentin komandasının əsas üzvüdür və büroya olan etimadı bərpa etmək üçün yorulmadan çalışır. Buna baxmayaraq, ekspertlər Ağ Ev daxilində Patelin mövqeyinin zəiflədiyini düşünür.

Müşahidəçilər qeyd edirlər ki, Patelin mümkün istefası həm FTB daxilində, həm də Tramp administrasiyasında güc balansına təsir göstərə bilər. Trampın ikinci müddətində təhlükəsizlik və hüquq-mühafizə strukturlarının yenidən formalaşdırılması fonunda bu addım daha geniş dəyişikliklərin başlanğıcı kimi dəyərləndirilir.

Poliqon.info