Tramp ABŞ-yə dərman, yük maşını və mebel idxalına yeni tariflər tətbiq edir

Poliqon xəbər verir ki, ABŞ prezidenti Donald Tramp yeni tarif paketi elan edib. Paketə əsasən, brend dərman məhsullarına 100%, böyük yük maşınlarına 25% tarif tətbiq olunacaq. Bu tədbirlər 1 oktyabrdan qüvvəyə minəcək.

Tramp hansı ölkələrdən idxal olunan məhsulların tariflərə tabe olacağını açıqlamayıb və bunun ABŞ-la ticarət sazişi olan dövlətlərə aid olub-olmadığı barədə məlumat verməyib.

Bundan əlavə, ABŞ-da mətbəx dolabları və vanna otağı mebellərinə 50%, yumşaq mebellərə isə 30% tarif tətbiq olunacaq. Xəbər Asiyada dərman şirkətlərinin səhmlərinin kəskin ucuzlaşmasına səbəb olub; Çin mebel istehsalçıları indeksi 1,1% azalıb.

Reuters-in ekspertlərə istinadən yazdığına görə, yüksək tariflər xüsusilə kommersiya yük maşınlarının qiymətlərini artıraraq, Trampın inflyasiyanı, xüsusilə əsas istehlak məhsullarında azaltmaq vədini çətinləşdirə bilər. Tramp bildirib ki, ağır yük maşınlarına tətbiq edilən yeni tariflər ABŞ istehsalçılarını “ədalətsiz rəqabətdən” qorumaq məqsədi daşıyır.

Poliqon.info