The Washington Post: Rusiya İrana ABŞ qüvvələrinə qarşı zərbələr üçün kəşfiyyat məlumatları ötürür...

Poliqon xəbər verir ki, The Washington Post qəzetinin anonim rəsmilərə istinadən yaydığı məlumata görə, Rusiya Yaxın Şərqdə yerləşən ABŞ hərbi qüvvələrinə qarşı zərbələrin istiqamətləndirilməsi üçün İrana kəşfiyyat məlumatları təqdim edir.

Nəşrin məlumatına əsasən, müharibənin başlanmasından etibarən Moskva Tehrana ABŞ-nin regiondakı hərbi obyektlərinin yerləşməsi ilə bağlı məlumatlar, o cümlədən hərbi gəmilərin və təyyarələrin mövqeləri barədə informasiyalar ötürüb.

Qəzetlə danışan üç anonim ABŞ rəsmisi bildiriblər ki, Rusiya tərəfindən təqdim edilən bu məlumatlar İranın raket və pilotsuz uçuş aparatlarının hədəflərinin müəyyənləşdirilməsində istifadə oluna bilər.

Eyni zamanda nəşr qeyd edir ki, daha iki anonim rəsmi şəxs Çinlə bağlı fərqli mövqenin olduğunu bildirib. Onların sözlərinə görə, Pekin Tehranla sıx siyasi və iqtisadi əlaqələrə malik olsa da, hazırkı münaqişə fonunda Çinin İrana hərbi və ya müdafiə xarakterli yardım göstərdiyinə dair əlamətlər müşahidə olunmur.

The Washington Post yazır ki, məsələ ilə bağlı aydınlıq gətirmək üçün Rusiya və Çin səfirliklərinə Vaşinqtonda rəsmi sorğular göndərilib, lakin qəzetin məlumatına görə, səfirliklər sorğuya cavab verməyib.

Poliqon.info