Tənzilə Rüstəmxanlının sakinlərlə görüşləri davam edir - Foto

Görüşdə həmçinin Xıllı qəsəbəsi, Abasallı, Mirzəqurbanlı, Yuxarı Qaramanlı və Seyidlər kəndlərindən olan sakinlər iştirak ediblər.

Poliqon xəbər verir ki, millət vəkili görüş zamanı seçildiyi qısa müddət ərzində Neftçala rayonu üzrə gördüyü işlər, aidiyyəti qurumlar və Milli Məclisdə qaldırdığı məsələlər, eləcə də həlli tapmış müraciətlər barədə sakinlərə məlumat verib.

Görüşdə iştirak edən Xıllı qəsəbəsindən olan ağsaqqal Abdulhəsən Xəlilov Kür çayını keçərək 3 km məsafəni piyada qət edərək tədbirə gəldiyini bildirib. O, nəvəsinin hərbi xidmətdə aldığı zədədən sonra cəmi bir həftə ərzində tərxis olunmasına Tənzilə Rüstəmxanlının nail olduğunu vurğulayaraq, “Millət vəkili bax belə olar” sözləri ilə təşəkkürünü ifadə edib. Bu çıxış iştirakçılar arasında duyğusal anlar yaşadıb.

Bundan əlavə, sakinlər kəndin suvarma sisteminin köhnəlməsi, işsizlik, torpaq və əkin sahələrinin su təminatında yaşanan problemlər, elektrik xətlərindəki nasazlıqlar, yol və nəqliyyat məsələləri, sosial problemlər və hüquq-mühafizə orqanlarının fəaliyyətinə dair müxtəlif müraciətlərini səsləndiriblər. Deputat bu məsələlərin həlli istiqamətində müvafiq addımlar atılacağını bildirib.

T. Rüstəmxanlı görüş çərçivəsində şəhid ailələri və qazilərlə də görüşərək onların müraciətlərini diqqətlə dinləyib. Problemlərin həlli üçün köməkçilərinə müvafiq tapşırıqlar verib. Deputat sakinlərin qaldırdığı məsələlərin həllini daim diqqətdə saxlayacağını vurğulayıb.

Poliqon.info