Sikorski: Aİ Ukraynaya dəstəyə təxminən 200 milyard avro xərcləyib...

Avropa İttifaqı Rusiya ilə hərbi münaqişə dövründə Ukraynaya dəstək üçün ümumilikdə təxminən 200 milyard avro vəsait xərcləyib.

Poliqon xəbər verir ki, bu barədə Polşanın xarici işlər naziri Radoslav Sikorski CBS News teleknslına müsahibəsində bildirib.

Diplomat vurğulayıb ki, hazırda Ukraynanın bütün əsas ehtiyaclarının maliyyələşdirilməsi yalnız Avropa hesabına həyata keçirilir. Onun sözlərinə görə, Donald Trampın yenidən ABŞ-nin prezidenti kimi Ağ Evə qayıdışından sonra Vaşinqton bu məqsədlə vəsait ayırmağı dayandırıb.

“Biz, Avropa, Ukraynaya dəstək üçün artıq ABŞ-dən xeyli çox səy göstərmişik və indi müharibəni tam şəkildə maliyyələşdiririk. ABŞ-nin maliyyələşdirilməsi ötən ilin yanvarında başa çatdı. Biz indiyədək təxminən 200 milyard avro xərcləmişik və növbəti iki il ərzində Ukraynaya dəstək üçün əlavə 90 milyard avro ayıracağıq”, deyə Sikorski bildirib.

Eyni zamanda o qeyd edib ki, ABŞ tam kənara çəkilməyib. Sikorskinin sözlərinə görə, Vaşinqton Ukraynaya müəyyən kəşfiyyat məlumatları təqdim edir, Avropa ilə birlikdə sanksiyaların tətbiqində iştirak edir və hazırda diplomatik təşəbbüslərdə rol alır.

“ABŞ bəzi kəşfiyyat məlumatlarını təqdim edir, biz birlikdə sanksiyalar tətbiq edirik — bu, vacibdir. Bundan əlavə, ABŞ hazırda diplomatik təşəbbüsdə iştirak edir və ümid edirik ki, bu proses uğurlu olacaq”, — deyə Polşa XİN rəhbəri əlavə edib.

Poliqon.info