Şərqdən Qərbə, Şimaldan Cənuba gedən nəqliyyat dəhlizləri türklərin əlindədir – Tokayev

Kasım-Jomart Tokayev: “Şərqdən Qərbə, Şimaldan Cənuba gedən bütün nəqliyyat dəhlizlərinə türklər nəzarət edir”.

PİA az xəbər verir ki, belə bir bəyanatla Türk Dövlətləri Təşkilatının IX Zirvə Görüşündə Qazaxıstan prezidenti Kasım-Jomart Tokayev çıxış edib.

Qazaxıstan prezidenti bildirib ki, hazırkı keçid dönəmində nəqliyyat-tranzit kommunikasiyalarının potensialının artırılması, onların imkanlarından maksimum istifadə olunması çox vacibdir:

“Bizim dövlətlərimiz Qərblə Şərqi, Şimalla Cənubu birləşdirir. Ona görə də indiki keçid dövründə nəqliyyat-tranzit kommunikasiyalarının potensialının artırılması, onların imkanlarından maksimum istifadə olunması çox vacibdir. Bunun bariz nümunəsi üç qardaş dövlətin - Qazaxıstan, Azərbaycan və Türkiyənin ərazisindən keçən Transxəzər Beynəlxalq Nəqliyyat Marşrutunu göstərmək olar. Ona görə də biz nəqliyyat və logistika sənayesinin inkişafını prioritet hesab edirik”.

Qazaxıstan prezidenti qeyd edib ki, son 15 ildə Qazaxıstan nəqliyyat-tranzit kommunikasiyalarının inkişafına 35 milyard dollar vəsait ayırıb:
“Ölkəmiz nəqliyyat marşrutlarının sayının artırılmasında və logistikanın inkişafında maraqlıdır”, deyə Qazaxıstan prezidenti vurğulayıb.

pia.az