Rusiya və Belarusun vahid valyutası olmayacaq – Hələlik...

Rusiya Mərkəzi Bankının rəhbəri Elvira Nabiullina Minskdə Belarus prezidenti Aleksandr Lukaşenko ilə işgüzar görüş keçirib.

Poliqon Rusiyanın “Kommersant” qəzetinə istinadən xəbər verir ki, onlar vahid valyutanın yaradılmasını, həmçinin maliyyə bazarlarına nəzarət sahəsində məlumat mübadiləsinə dair sazişi müzakirə ediblər.

“Söhbət vahid valyutanın yaradılmasından və sairdən gələndə dövlət başçıları səviyyəsində sizin sədrimizdən tez-tez sitat gətirirəm ki, bu asan proses deyil. Və yəqin ki, Rusiya prezidenti ilə razılaşdığımız kimi, bu gün deyil”, deyə görüş əsnasında Lukaşenko bildirib. Eyni zamanda Belarus prezidenti vurğulayıb ki, hazırda Rusiya Mərkəzi Bankı və Belarus Milli Bankının Banklararası Valyuta Şurası fəaliyyətini davam etdirir.

Lukaşenko qeyd edib ki, Rusiya və Belarusun maliyyə bazarlarına nəzarət sahəsində məlumat mübadiləsinə dair saziş layihəsinə Mərkəzi Bankların Banklararası Valyuta Şurasının iclası zamanı baxılacaq. İclasda Belarus Milli Bankının İdarə Heyətinin sədri Pavel Kallaur və Rusiya Federasiyası Bankının sədri Elvira Nabiullina iştirak edəcək.

Poliqon.info