Rusiya indiyədək Ukraynaya nə qədər ziyan vurub?...

Rusiyanın başlatdığı müharibə nəticəsində Ukraynanın infrastrukturuna dəymiş birbaşa sənədləşdirilmiş zərərin ümumi məbləği 2023-cü ilin aprelinə 147,5 milyard dollara çatır.

Poliqon xəbər verir ki, Kiyev İqtisadiyyat Məktəbinin (KSE) “Rusiya ödəyəcək” layihəsinin ekspertləri belə təxminlər irəli sürürlər.

“2023-cü ilin aprel ayının yekunlarına görə, mənzil fonduna dəymiş zərərin həcmi bu ilin fevral ayı ilə müqayisədə 1,2 milyard dollar artıb, 53,6 milyard dollardan 54,4 milyard dollara yüksəlib. Zərər çəkmiş və ya dağılmış yaşayış binalarının, o cümlədən fərdi, çoxmərtəbəli binaların ümumi sayı demək olar ki, 158 minə yaxındır”, deyə hesabatda qeyd olunur.

İtkilərin həcminə görə ikinci və üçüncü yerlərdə infrastruktur və sənaye sahələri və müəssisələrin itkiləri qərarlaşıb. İnfrastruktura dəymiş ziyanın məbləği dəyişməz olaraq qalır - 36,2 milyard dollar. Müəssisələrin aktivləri isə daha 100 min dollar artıb və itkilərin ümumi məbləği 11,4 milyard dollardır.

Müharibənin təhsil sahəsinin infrastrukturuna vurduğu ziyan da artıb. Bu ilin aprel ayının yekunlarına görə, qəzalı və dağılmış təhsil müəssisələrinin ümumi sayı 3,2 minə çatır ki, onların arasında 1,5 mindən çox orta təhsil müəssisəsi, minə yaxını məktəbəqədər təhsil müəssisəsi, 538-i ali təhsil müəssisəsidir. Təhsil sektoruna dəyən ziyanın ümumilikdə 9,1 milyard dollar olduğu qeyd edilir.

Həmçinin enerji infrastrukturunun zədələnməsi nəticəsində birbaşa itkilər daha 200 milyon dollar artıb və hazırda belə itkilərin ümumi məbləği 8,3 milyard dollar təşkil edir.

“Səhiyyə sektoruna dəyən ziyan daha 0,9 milyard dollar artıb. 2023-cü ilin fevral ayı ilə müqayisədə aprel ayına səhiyyə sektorunda itkilər 1,8 milyard dollardan 2,7 milyard dollara yüksəlib. Ümumilikdə, 806 obyekt dağıdılıb və ya zədələnib. onların arasında 367 xəstəxana və 341 ambulatoriya mərkəzi var”, deyə ekspertləri bildiriblər.

Qeyd edək ki, Dünya Bankının hesablamalarına görə, Ukraynanın bərpası üçün ən azı 411 milyard dollar lazımdır. Elan edilmiş məbləğ Ukraynanın 2022-ci il üçün ÜDM-dən 2,6 dəfə çoxdur.

May ayında Ukrayna prezidenti Volodimir Zelenski Ukraynanın bərpası üçün 400 milyard dollardan çox vəsaitə ehtiyac olduğunu açıqlamışdı. Eyni zamanda, bu məbləğ işğal altında qalan ərazilərdəki dağıntıları nəzərə almır.

Poliqon.info