Qəzzaya 200-dən çox maşın humanitar yardım daxil olub

Qəzza zolağına humanitar yardım daşıyan 210-dan çox yük maşını və yemək bişirmək və həyati vacib infrastrukturun saxlanması üçün içində maye qaz olan 6 çən buraxılıb.

Poliqon xəbər verir ki, bu barədə “Ynet News” portalı Müdafiə Nazirliyi yanında İsrail Hökumətinin Fələstin Ərazilərindəki Fəaliyyətlərinin Əlaqələndirilməsi İdarəsinə (COGAT) istinadən məlumat yayıb.

Humanitar yardım daşıyan 216 yük maşını Qəzza zolağına yollanıb. Onlardan 165-i Kerem Şalom keçid məntəqəsindən, 51-i Erez keçid məntəqəsindən keçib. Yük maşınları Qəzzaya qida və tibbi avadanlıq, o cümlədən poliomielit peyvəndi gətiriblər.

Xatırladaq ki, humanitar təşkilatlar İsraili Qəzza əhalisinin humanitar yardıma çıxışını qəsdən məhdudlaşdırmaqda ittiham edir. Yəhudi dövləti belə məhdudiyyətlərin olmadığını israr edir.

Poliqon.info