“Oskar-2026” mərasimində siyasi bəyanatlar- Xavyer Bardem “Müharibəyə yox, Fələstinə azadlıq” deyib

Poliqon xəbər verir ki, ABŞ-də keçirilən 98-ci “Oskar” mükafatlandırma mərasimində bir sıra tanınmış kino xadimləri siyasi bəyanatlarla çıxış ediblər. Onlardan biri ispan aktyoru Xavyer Bardem olub.

57 yaşlı aktyor mərasimdə “Ən yaxşı beynəlxalq film” nominasiyası üzrə mükafatı təqdim etməyə hazırlaşarkən diqqət çəkən siyasi mesaj verib. Onun pencəyində üzərində ispan dilində “No a la guerra” (“Müharibəyə yox”) və ingilis dilində “Free Palestine” (“Fələstinə azadlıq”) yazılmış iki nişan yerləşdirilib.

Bardem qırmızı xalça üzərində The Hollywood Reporter nəşrinə verdiyi açıqlamada bildirib ki, bu addımı regionda davam edən münaqişələrə diqqət çəkmək üçün atıb. O, qeyd edib ki, dünya bir neçə onillik əvvəlki hadisələrdən sonra yenidən yeni müharibələrlə üz-üzə qalıb.

Aktyor bildirib ki, onun fikrincə, ABŞ və İsrailin İranla bağlı siyasəti regionda gərginliyi daha da artırır və bu proses müxtəlif siyasi və sosial reaksiyalara səbəb olur.

Bardem mərasimdə siyasi mövqe bildirən yeganə şəxs olmayıb. Aktivist və yazıçı Qlennon Doyl qırmızı xalçada üzərində ABŞ Miqrasiya və Gömrük İcra Xidmətinə (ICE) qarşı mesaj olan qara çanta ilə görünüb. Onun həyat yoldaşı, keçmiş futbolçu Ebbi Uombax isə “ICE OUT” yazılı nişan taxıb.

Britaniyalı aktrisa Şaritra Çandran da Qəzzada atəşkəs çağırışını dəstəklədiyini göstərmək üçün qırmızı nişan taxaraq mərasimə qatılıb. O bildirib ki, ictimai platformaya sahib olan insanların müharibə və humanitar böhranlar barədə danışması vacibdir.

Eyni aksiyanı “The Voice of Hind Rajab” filminin aktyorları Sacə Kilani və Amer Xlel də dəstəkləyiblər. Film altı yaşlı fələstinli qızın ölümündən bəhs edir. Kilani çıxışında bildirib ki, regionda münaqişələr davam edir və bir çox ölkələrdə humanitar vəziyyət ağır olaraq qalır.

Analitiklər qeyd edirlər ki, son illərdə “Oskar” kimi böyük beynəlxalq tədbirlər təkcə kino sənayesinin deyil, həm də qlobal siyasi və humanitar problemlərin müzakirə olunduğu platformaya çevrilib.

Poliqon.info