Çində ilk dəfə insana donuzdan götürülmüş qaraciyər və iki böyrək köçürülüb

Poliqon xəbər verir ki, Med nəşrinin məlumatına görə, Çində ilk dəfə insana donuzdan götürülmüş qaraciyər və iki böyrək eyni vaxtda transplantasiya edilib. Məlumata əsasən, əməliyyat beyin ölümü diaqnozu qoyulmuş 53 yaşlı pasiyent üzərində həyata keçirilib.

Bildirilir ki, köçürülən orqanlar transplantasiyadan sonra təxminən beş gün ərzində fəaliyyət göstərib və bu müddət ərzində hiperakut, yəni son dərəcə sürətli immun rədd reaksiyası müşahidə olunmayıb. Tədqiqatçılar bunu tibbi eksperiment baxımından mühüm nəticə kimi qiymətləndiriblər.

Mütəxəssislərin fikrincə, əldə olunan nəticələr heyvan orqanlarının insanlara transplantasiyası istiqamətində fundamental imkanların mövcudluğunu göstərir və gələcəkdə donor orqan çatışmazlığı probleminin aradan qaldırılmasına kömək edə bilər.

“Təcrübə belə transplantasiyanın prinsip etibarilə mümkün olduğunu göstərib və donor orqan çatışmazlığı ilə mübarizəyə töhfə verə bilər”, deyə tədqiqatçılar bildiriblər.

Alimlər vurğulayıblar ki, transplantasiya sahəsində bu tip təcrübələr uzunmüddətli təhlükəsizlik və orqan uyğunluğu ilə bağlı əlavə araşdırmalar tələb edir. Bununla belə, onlar hesab edirlər ki, ksenotransplantasiya, yəni heyvan orqanlarının insanlara köçürülməsi gələcəkdə milyonlarla xəstə üçün yeni müalicə perspektivləri aça bilər.

Poliqon.info