Simonyan Paşinyanın devrilməsinə çağırıb

Poliqon xəbər verir ki, Rusiyanın dövlət təbliğat mediasının əsas simalarından biri, “Russia Today” və “Sputnik” media qrupunun baş redaktoru Marqarita Simonyan Ermənistanın baş naziri Nikol Paşinyanı yenidən sərt şəkildə tənqid edib.

Simonyan çıxışı zamanı Ermənistan vətəndaşlarını Paşinyanı hakimiyyətdən “uzaqlaşdırmağa” çağırıb.

“Paşinyana səs vermək yalnız güclü hallüsinogen və narkotik təsiri altında mümkün ola bilər”, deyə Kremlin təbliğat ruporu bildirib.

Kremlə yaxın media rəhbəri ironik şəkildə Ermənistana çörək və darı göndərilməsini də təklif edib. O iddia edib ki, əgər ölkə vətəndaşları hazırkı baş naziri dəstəkləyirlərsə, bu, “kütləvi göbələk istifadəsi” ilə əlaqəli ola bilər.

Bununla yanaşı, Simonyan “Allaha şükür edirəm ki, Ermənistan vətəndaşı deyiləm” deyərək əlavə edib ki, “Rusiya Ermənistansız keçinə bilər, amma Ermənistan Rusiyasız yox”.

Onun açıqlamaları sosial şəbəkələrdə və siyasi dairələrdə geniş müzakirələrə səbəb olub. Simonyanın bəyanatları son illərdə Moskva ilə İrəvan arasında münasibətlərin gərginləşdiyi bir dövrdə səslənib.

Qeyd edək ki, Nikol Paşinyan son aylarda Rusiyanın regiondakı siyasətini açıq şəkildə tənqid edir və Ermənistanın təhlükəsizlik siyasətində yeni tərəfdaşlıqlar qurmağa çalışır. Bu isə Rusiya siyasi və media dairələrində narazılıq doğurur.

Poliqon.info