Elşad Həsənovun “Şəhərsalma və Memarlıq ili”nə qanunsuz tikinti töhfəsi

Poliqon xəbər verir ki, sakinlərin Bizimesr.com portalına verdiyi məlumata görə, “İnşaatçılar” metro stansiyasının çıxışına yaxın ərazidə geniş sahə hasarlanıb və ərazidə tikintiyə hazırlıq işləri aparılır. Bildirilir ki, hasarlanan ərazidə aparılacaq tikinti ilə bağlı heç bir məlumat lövhəsi yerləşdirilməyib. 

Ərazidə yaşayan sakinlər iddia edir ki, sözügedən küçədə əvvəllər də aparılan obyekt tikintiləri zamanı piyadalar üçün nəzərdə tutulan səkilər daraldılıb. Onların sözlərinə görə, yeni tikintinin də eyni problemlərə səbəb olacağı gözlənilir.

Sakinlər hesab edir ki, tikinti ilə bağlı ictimaiyyətə açıq məlumat verilməməsi prosesin qanunsuz aparılması ilə bağlı şübhələri artırır. İddialara görə, məsələ ilə bağlı aidiyyəti qurumlar, xüsusilə Yasamal Rayon İcra Hakimiyyəti tərəfindən hər hansı tədbir görülmür.

Belə qanunsuz tikintilərin ölkədə elan olunan “Şəhərsalma və Memarlıq ili” fonunda baş verməsi maraq yaradır. Sakinlər şəhərsalma qaydalarına uyğun olmayan belə halların paytaxtın mərkəzi ərazilərində davam etməsinin ciddi narahatlıq yaratdığını bildirirlər.

Qeyd edək ki, Yasamal Rayon İcra Hakimiyyətinin başçısı Elşad Həsənovdur.

Poliqon.info