CNN: Kremldə Putinin təhlükəsizliyi görünməmiş səviyyədə gücləndirilib

Poliqon xəbər verir ki, CNN telekanalının yayımladığı və Avropa agentliklərindən birinə təqdim olunmuş kəşfiyyat hesabatına əsasən, Kreml Rusiya prezidenti Vladimir Putinin təhlükəsizliyini ciddi şəkildə gücləndirib.

Məlumata görə, Kremlin rəhbərliyi mümkün sui-qəsd, daxili çevriliş cəhdi və hakimiyyət daxilində artan qeyri-sabitlik ehtimalından narahatdır. Hesabatda qeyd olunur ki, son aylarda Putinin ətrafında tətbiq olunan təhlükəsizlik tədbirləri əhəmiyyətli dərəcədə sərtləşdirilib.

Sənədə əsasən, prezidentin yaxın çevrəsində genişmiqyaslı nəzarət və izləmə sistemləri quraşdırılıb. Putinə xidmət göstərən şəxslərə — aşpazlara, mühafizəçilərə, şəxsi fotoqraflara və digər yaxın əməkdaşlara ictimai nəqliyyatdan istifadə qadağan edilib.

Bundan əlavə, Kremlin ərazisinə daxil olan şəxslər iki mərhələli yoxlamadan keçirilir. Putinin administrasiyasında çalışan əməkdaşlara isə yalnız internetə çıxışı olmayan xüsusi telefonlardan istifadə etməyə icazə verilir.

Hesabatda vurğulanır ki, “Kreml prezident Vladimir Putinin şəxsi mühafizəsini əhəmiyyətli dərəcədə gücləndirib”.

Sənəddə həmçinin qeyd olunur ki, Putinin hərəkət marşrutları və ictimai fəaliyyəti də ciddi şəkildə məhdudlaşdırılıb. Bildirilir ki, Rusiya prezidenti əvvəlki illərlə müqayisədə daha az sayda hərbi obyektə və daimi iqamətgahlarına səfər edir. Onun bəzi ictimai çıxışlarının isə əvvəlcədən lentə alınmış videolarla əvəz olunduğu iddia edilir.

Kəşfiyyat hesabatında Rusiya siyasi elitası daxilində qarşıdurmaların və etimadsızlığın artdığı da vurğulanır. Xüsusilə məxfi məlumatların sızdırılması və mümkün hakimiyyət dəyişikliyi ssenariləri Kremlin əsas narahatlıqları sırasında göstərilir.

“Kreml və şəxsən Putin gizli məlumatların sızdırılması və dövlət çevrilişi cəhdi riskindən ciddi şəkildə narahatdır”, deyə hesabatda bildirilir.

Sənəddə təhlükəsizlik və güc strukturları daxilində münasibətlərin gərginləşdiyi də qeyd olunur. Xüsusilə Müdafiə Nazirliyinin rəhbərliyinə yaxın şəxslər arasında həyata keçirilən həbslərin hakimiyyət daxilində şübhələri və nüfuz uğrunda mübarizəni daha da gücləndirdiyi vurğulanır.

Analitiklər hesab edirlər ki, belə məlumatların ortaya çıxması Kremlin daxili sabitliklə bağlı narahatlıqlarının artdığını göstərə bilər. Ekspertlərin fikrincə, Ukrayna müharibəsinin uzanması, iqtisadi təzyiqlər və elita daxilində nüfuz uğrunda rəqabət Rusiya hakimiyyət sistemində gərginliyi daha da artırır.

Rəsmi Moskva isə CNN-in yaydığı məlumatlara hələlik münasibət bildirməyib.

Poliqon.info