Tramp: İranın blokadası onu yenidən danışıqlara qaytarmağa hesablanıb...

Poliqon xəbər verir ki, bu barədə Donald Tramp İran ətrafında formalaşan vəziyyətə münasibət bildirərkən danışıb. ABŞ Prezidenti deyib ki, İrana qarşı tətbiq olunan dəniz blokadasının məqsədlərindən biri də Tehranın yenidən danışıqlar masasına qayıtmasına təzyiq göstərməkdir. O, eyni zamanda bəzi ABŞ müttəfiqləri və tərəfdaşlarının da bu əməliyyatda iştirak edəcəyini söyləyib.

Trampın sözlərinə görə, Vaşinqton bu ölkələrin adlarını “yəqin ki, sabah” açıqlayacaq. ABŞ lideri blokadanın dərhal nəticə verməyəcəyini, lakin qısa müddət ərzində təsirli olacağını bildirib. Onun açıqlaması İranla aparılan son təmasların nəticəsiz qalmasından sonra səslənib. 

Bu bəyanat ABŞ-nin İran limanları və sahil xətti boyunca nəqliyyat hərəkətinə qarşı daha sərt tədbirlərə keçdiyi bir mərhələdə verilib. Reuters-in yaydığı məlumata görə, ABŞ tərəfi blokadanın bütün İran limanlarını və sahil zonalarını əhatə edəcəyini bildirib, bu isə əməliyyatın təkcə hərbi deyil, həm də ciddi siyasi və iqtisadi təzyiq aləti kimi nəzərdə tutulduğunu göstərir.

Bununla belə, beynəlxalq müttəfiqlərin iştirakı məsələsi ətrafında qeyri-müəyyənlik qalır. Reuters yazır ki, NATO üzrə bəzi əsas Avropa müttəfiqləri, o cümlədən Böyük Britaniya və Fransa, hələlik ABŞ-nin blokada planına qoşulmağa razılıq verməyiblər və daha çox atəşkəsdən sonra gəmiçiliyin təhlükəsizliyinə yönəlmiş ayrıca təşəbbüslərə üstünlük verirlər. Bu isə Trampın elan etdiyi koalisiyanın tərkibi və miqyası ilə bağlı sualları açıq saxlayır. 

Trampın açıqlamaları onu göstərir ki, Vaşinqton İranla münasibətlərdə hərbi-siyasi təzyiqi diplomatik məqsədlə birləşdirməyə çalışır. Ağ Evin hesablamasına görə, dəniz blokadası Tehranı güzəştlərə məcbur edə və danışıqlar prosesini yenidən işə sala bilər. Lakin bu addımın regionda gərginliyi daha da artırmaq, enerji marşrutlarına təsir göstərmək və beynəlxalq tərəfdaşlar arasında fikir ayrılıqlarını dərinləşdirmək ehtimalı da az deyil.

Poliqon.info