İran Qırmızı Xaç Komitəsinə müraciət edib: Mülki əhalinin qorunması tələb olunur...

İran ABŞ və İsrail tərəfindən həyata keçirilən hərbi əməliyyatlar fonunda mülki əhalinin qorunması məqsədilə Beynəlxalq Qırmızı Xaç Komitəsinə (BQXK) rəsmi müraciət edib.

Poliqon xəbər verir ki, bu barədə İranın BMT yanında daimi nümayəndəsi Əli Bəhrəyni tərəfindən təşkilatın prezidenti Miryana Spoljaricə ünvanlanan məktubda qeyd olunub.

Sənəddə vurğulanır ki, BQXK-nın beynəlxalq humanitar hüququn təşviqi və icrasına nəzarət mandatı nəzərə alınaraq, təşkilat ABŞ və İsrailin hərbi əməliyyatlarını açıq şəkildə pisləməli və mülki əhalinin müdafiəsi istiqamətində təcili tədbirlər görməlidir. Məktubun mətninə “RIA Novosti” agentliyi istinad edib.

Əli Bəhrəyni müraciətində bildirib ki, həyata keçirilən zərbələr zamanı xəstəxanalar, məktəblər və digər mülki obyektlərə qarşı seçimsiz atəş açıldığı iddia olunur. Onun sözlərinə görə, bu cür hərəkətlər 1949-cu il Cenevrə Konvensiyalarının müddəalarına ziddir və beynəlxalq humanitar hüququn ciddi şəkildə pozulması kimi qiymətləndirilməlidir.

İran tərəfi beynəlxalq ictimaiyyəti və xüsusilə humanitar təşkilatları baş verənlərə hüquqi və siyasi qiymət verməyə çağırıb. Rəsmi Tehran hesab edir ki, münaqişə zonalarında mülki şəxslərin və infrastrukturların qorunması beynəlxalq hüququn əsas prinsiplərindən biridir və bu prinsiplərin pozulması regionda humanitar vəziyyəti daha da ağırlaşdıra bilər.

Hazırda ABŞ və İsrail tərəfindən sözügedən iddialarla bağlı rəsmi açıqlama verilməyib. Bununla yanaşı, regionda davam edən hərbi əməliyyatlar və mümkün humanitar nəticələr beynəlxalq təşkilatlar tərəfindən yaxından izlənilir.

Poliqon.info