ABŞ Kubaya Venesuela neftinin satışına qoyulan bəzi məhdudiyyətləri yumşaldıb

Poliqon xəbər verir ki, The Wall Street Journal nəşrinin məlumatına görə, ABŞ administrasiyası humanitar böhranın dərinləşməsi fonunda Kubaya yanacaq tədarükü ilə bağlı bəzi məhdudiyyətləri yumşaldıb. Yeni siyasətə əsasən, Venesuela neftinin adada fəaliyyət göstərən özəl şirkətlər tərəfindən yenidən satılmasına icazə verilir.

ABŞ Maliyyə Nazirliyinin açıqlamasına görə, bu qərar yalnız “Kuba xalqını dəstəkləyən” kiçik və orta özəl biznes strukturlarının iştirak etdiyi əməliyyatlara şamil olunur. Eyni zamanda, Havana hökumətinə və dövlət qurumlarına birbaşa neft və yanacaq satışı əvvəlki kimi qanunsuz hesab olunur.

Məlumata əsasən, Kuba dövləti uzun illər ərzində neft ticarəti üzərində tam inhisar saxlayıb. Lakin son aylarda ölkədə enerji çatışmazlığının kəskinləşməsi, elektrik kəsintilərinin artması və iqtisadi vəziyyətin ağırlaşması fonunda rəsmi Havana siyasətini qismən dəyişərək artan sayda kiçik özəl müəssisəyə yanacaq idxalına icazə verib.

Ekspertlərin qiymətləndirməsinə görə, Vaşinqtonun bu addımı bir tərəfdən Kuba iqtisadiyyatında formalaşmaqda olan özəl sektoru gücləndirməyə, digər tərəfdən isə enerji böhranının yaratdığı sosial gərginliyi azaltmağa hesablanıb. Bununla belə, ABŞ-nin sanksiya rejimi ümumi şəkildə qüvvədə qalır və dövlət strukturlarını əhatə edən enerji əməliyyatlarına tətbiq olunmağa davam edir.

Müşahidəçilər bildirirlər ki, yeni mexanizm Kubaya məhdud həcmdə yanacaq axınını bərpa edə bilər, lakin ölkənin dərin enerji və maliyyə problemlərini tam həll etmək üçün bu addımın kifayət etməsi gözlənilmir.

Poliqon.info