Tramp mümkün varisləri ilə bağlı müzakirələr aparır

2028-ci il seçkiləri üçün Respublikaçıların mümkün tandem ssenarisi nəzərdən keçiriilir.

ABŞ prezidenti Donald Trump yaxın ətrafı ilə 2028-ci il prezident seçkilərində onu əvəz edə biləcək mümkün namizədlər barədə müzakirələri intensivləşdirib.

Poliqon xəbər verir ki, bu barədə Axios nəşri məlumat yayıb.

Məlumata görə, son dövrlər Trampın siyasi varisi ilə bağlı söhbətlər artıb və o, bu məsələni mütəmadi olaraq yaxın siyasi müttəfiqləri ilə müzakirə edir. Mənbələr bildirir ki, prezidentin Marco Rubio haqqında açıq şəkildə müsbət fikirlər səsləndirməsi onun J. D. Vance-ə münasibətinin soyuması kimi qiymətləndirilməməlidir.

Nəşrin yazdığına görə, Trampın komandasında ideal ssenari kimi 2028-ci il seçkiləri üçün Vens–Rubio tandemi nəzərdən keçirilir. Bu modeldə əsas prezidentliyə namizəd kimi Vensin adı çəkilir, Rubionun isə komandanın mühüm siyasi fiqurlarından biri olması ehtimal edilir.

Bildirilir ki, Vensin artıq prezident seçki kampaniyasının əsasını təşkil edə biləcək peşəkar siyasi məsləhətçilərdən ibarət komandası formalaşıb. Rubio isə hələlik belə geniş seçki infrastrukturu yaratmayıb. Bununla belə, senator daha əvvəl Vensə açıq dəstək verəcəyini bəyan edib. O, 2025-ci ildə verdiyi müsahibədə Vensin namizədliyini irəli sürəcəyi təqdirdə onu ilk dəstəkləyən siyasətçilərdən biri olacağını bildirib.

Müşahidəçilərin fikrincə, Trampın mümkün varis məsələsini indidən gündəmdə saxlaması Respublikaçılar Partiyası daxilində güc balansının formalaşdırılması və gələcək seçki strategiyasının əvvəlcədən müəyyənləşdirilməsi məqsədi daşıyır.

Poliqon.info