Qərb rəsmiləri: Rusiya 2026-cı il boyu müharibəni davam etdirmək üçün resurslara sahibdir...

Poliqon xəbər verir ki, Bloomberg Agentliyinin istinad etdiyi Qərb rəsmilərinin qiymətləndirməsinə görə, Rusiya artan itkilərə baxmayaraq 2026-cı il ərzində müharibəni davam etdirmək imkanına malikdir. Analitiklər bunu canlı qüvvə cəlbi, hərbi sənayenin işlək qalması və bəzi ölkələrin, o cümlədən Çin kimi tərəfdaşların dolayı dəstəyi ilə əlaqələndirirlər.

Qərb rəsmilərinin hesablamalarına görə, ötən il Rusiyanın itkiləri təxminən 415 min ölü və yaralı təşkil edib. Bu rəqəm 2024-cü illə (təxminən 430 min ölü və yaralı) müqayisədə az fərqlənir. Ümumilikdə isə müharibə dövründə Rusiyanın itkilərinin 1,2 milyon nəfəri keçdiyi bildirilir.

Məlumata əsasən, dekabr ayında Rusiya ordusu gündə orta hesabla 1130 nəfər ölü və yaralı verib, aylıq itkilər isə təxminən 35 min nəfərə çatıb. Bu qiymətləndirmələr daha əvvəl NATO tərəfindən də səsləndirilib. Yanvar ayında isə itkilərin səviyyəsinin yeni könüllülərin cəlb olunması tempini üstələdiyi qeyd olunur.

Ekspertlər itkilərin artmasını əsasən Ukrayna tərəfindən istifadə olunan pilotsuz uçuş aparatlarının texnoloji baxımdan təkmilləşdirilməsi ilə izah edirlər. Eyni zamanda, bəzi Qərb rəsmiləri Rusiyanın getdikcə daha çox xarici muzdluların cəlbinə arxalandığını bildirirlər.

Böyük Britaniyanın müdafiə naziri John Healey qeyd edib ki, xarici döyüşçülər əsasən Hindistan, Pakistan, Nepal, Nigeriya, Seneqal və Kuba kimi ölkələrdən cəlb olunur. Onun sözlərinə görə, bu şəxslər bəzən yanlış vədlərlə razı salınır və faktiki olaraq cəbhəyə göndərildiklərini tam anlamaya bilirlər. Nazir həmçinin Şimali Koreya mənşəli təxminən 17 min hərbçinin də Rusiyanın tərəfində müharibəyə cəlb olunduğunu bildirib.

Rusiya hakimiyyəti itkilərlə bağlı rəsmi statistik məlumat açıqlamır. Bununla belə, prezident Vladimir Putin və hərbi rəhbərlik açıq çıxışlarında Rusiya ordusunun itkilərinin Ukrayna qüvvələri ilə müqayisədə xeyli az olduğunu iddia edir.

Analitiklərin fikrincə, yüksək itkilərə baxmayaraq, Rusiyanın cəbhədə irəliləyişi hələ də ləng gedir. Mövcud temp saxlanılarsa, Donetsk vilayətinin şərq hissəsinə tam nəzarətin əldə olunması üçün Moskvanın daha iki ilə yaxın vaxta ehtiyacı ola bilər.

Poliqon.info