WSJ: İranda xalq narazılığının yeni dalğası güclənir...

Poliqon xəbər verir ki, The Wall Street Journal nəşrinin məlumatına görə, yanvar ayında etiraz aksiyalarının amansız şəkildə dağıdılmasından sonra İranda əhali arasında rejimə qarşı narazılığın ikinci geniş dalğası formalaşır. Bildirilir ki, nümayişçilərin kütləvi şəkildə öldürülməsindən sonra ölkədə sosial gərginlik daha da artıb və repressiya təhlükəsinə baxmayaraq, vətəndaşlar hakimiyyətə açıq şəkildə meydan oxumağa başlayıblar.

Məlumata əsasən, etirazlarda həyatını itirən şəxslərin dəfn mərasimləri və yas mərasimləri rejimə qarşı şüarların səsləndirildiyi aksiyalara çevrilir. Tələbələrin dövlət tərəfindən tətbiq edilən ritualları yerinə yetirməkdən imtina etdiyi, tibb işçilərinin isə yaralı etirazçıları müalicə etdiklərinə görə həbs olunan həmkarlarının müdafiəsinə açıq şəkildə qalxdığı bildirilir. Eyni zamanda, bir sıra fəal qruplar ölkənin ali dini lideri Ayətullah Əli Xameneinin devrilməsinə çağırışlar edir və mövcud siyasi sistemin islahatlar üçün yararsız olduğunu bəyan edirlər.

Nəşr qeyd edir ki, hakimiyyət narazılığın qarşısını almaq üçün genişmiqyaslı həbslərə başlayıb. Məlumatlara görə, etirazçılar, onların tərəfdarları və yaralılara tibbi yardım göstərən şəxslər də daxil olmaqla 50 mindən çox insan saxlanılıb. Bəzi hallarda təhlükəsizlik qüvvələrinin xəstəxanalara daxil olaraq yaralıları və onları müalicə edən həkimləri həbs etdiyi bildirilir.

Buna baxmayaraq, iranlılar həyat və azadlıq təhlükəsi ilə üzləşmələrinə rəğmən, müxtəlif formalarda etirazlarını davam etdirirlər. Bu etirazlar həm açıq aksiyalar, həm də sakit itaətsizlik nümunələri şəklində özünü göstərir. Analitiklər hesab edir ki, yanvar hadisələri zamanı tətbiq edilən zorakılıq, ölkədəki ağır sosial-iqtisadi vəziyyət və artan sosial təzyiqlər əhali arasında narazılığı daha da dərinləşdirib.

WSJ yazır ki, mövcud vəziyyət son dərəcə qeyri-sabit olaraq qalır. İqtisadi çətinliklər, sosial gərginlik və sərt repressiyalar getdikcə daha çox insanı hakimiyyətə qarşı açıq mövqe sərgiləməyə sövq edir. Eyni zamanda, nəşr fevral ayının ortalarına planlaşdırılan yeni etiraz aksiyalarına hazırlıq görüldüyünü də qeyd edir.

Poliqon.info