Sorğu: Yəhudilərin yarısı Netanyahuya istefasız əfv verilməsinə qarşı çıxır...

Poliqon xəbər verir ki, İsrailin “12-ci kanal” telekanalı Baş nazir Benyamin Netanyahunun prezidentə özünə əfv verilməsi barədə müraciət təqdim etməsindən sonra ölkə ictimaiyyəti arasında sorğu keçirib. Nəticələr göstərib ki, respondentlərin 48%-i Netanyahunun istefa vermədən əfv olunmasına qarşı çıxır. Sorğu iştirakçılarının 36%-i bu qərarı dəstəklədiyini, 16%-i isə mövqeyinin qeyri-müəyyən qaldığını bildirib.

Sorğuda həmçinin “Netanyahunun siyasətdən tam çəkilməsi müqabilində əfv edilməsinə münasibətiniz necədir?” sualı da verilib. Respondentlərin 38%-i belə bir razılaşmanı dəstəklədiyini, 42%-i isə bunun əleyhinə olduğunu bildirib. Qalan 20% qərarsız qalıb.

Məlumata görə, ədliyyə nazirliyinin əfv məsələləri üzrə departamenti artıq Netanyahunun müraciətini araşdırmaq üçün prosedura başlayıb və müvafiq rəy hazırlayaraq ədliyyə nazirinə təqdim edəcək. Eyni zamanda, baş nazir barəsində cinayət işinə nəzarət edən baş prokuror da müraciətlə bağlı öz rəyini bildirəcək. Bütün materiallar prezident İsxak Hersoqa təqdim edildikdən sonra o üç mümkün qərardan birini seçməlidir. Prezident müraciəti tam rədd edə, ya da, baş naziri əfv edərək məhkəmə prosesini dayandıra və ya şərti əfv verə bilər.

Prezident Hersoq daha əvvəl bəyan etmişdi ki, qərar qəbul edərkən heç bir tərəfin təzyiqinə boyun əyməyəcək. Kompleks hüquqi proses səbəbindən yekun qərarın bir neçə həftə çəkəcəyi gözlənilir.

Poliqon.info