Nəzakətli robotlar uşaqların davranışına təsir edir

Poliqon xəbər verir ki, Computers in Human Behavior jurnalında dərc olunan yeni tədqiqat məktəblərdə robotlarla ünsiyyətin uşaqların davranışına birbaşa təsir etdiyini üzə çıxarıb. Alimlər 7–12 yaşlı 251 məktəblinin humanoid robot Pepper ilə ünsiyyətini müşahidə edərək robotun danışıq tərzinin – nəzakətli, yumşaq və ya daha sərt-komanda üslubunun – uşaqlara necə təsir etdiyini araşdırıblar.

Tədqiqat nəticələrinə görə, robot uşaqlara mehriban və hörmətlə müraciət edəndə, şagirdlər də eyni şəkildə cavab verirdilər. Onlar “təşəkkür edirəm” deməyə daha çox meylli olur, təlimatları diqqətlə dinləyir, daha sakit və nizamlı davranırdılar. Hətta robotun daha sərt, əmredici tonda danışdığı hallarda belə, uşaqlar əksərən nəzakətli qalmağa çalışırdılar, sanki böyüklərin onlara öyrətdiyi davranış qaydalarını robotla ünsiyyətdə də tətbiq edirdilər.

Tədqiqatın maraqlı məqamlarından biri odur ki, daha kiçik yaşlı uşaqlar və qızlar Pepper-i canlı varlığa bənzətməyə daha çox meylli idilər. Onlar robotun hiss edə biləcəyini, nəyisə arzulaya biləcəyini və emosional reaksiyaları ola biləcəyini düşünürdülər. Bu təsəvvür xüsusilə robotun “qadın adı” ilə təqdim edildiyi və nəzakətli danışıq üslubu ilə proqramlaşdırıldığı situasiyalarda güclənirdi.

Mütəxəssislər hesab edirlər ki, nəticələr robotların gələcəkdə məktəblərdə istifadəsi üçün çox vacibdir. Əgər robotlar sinif otaqlarında köməkçi, tədris vasitəsi və ya interaktiv müəllim qismində tətbiq olunacaqsa, onların danışıq tərzi uşaqların nə dərəcədə rahat hiss etməsinə, əməkdaşlığa açıq olmasına və hətta hansı sosial davranışları mənimsəməsinə birbaşa təsir göstərə bilər.

Tədqiqat faktiki olaraq göstərir ki, robotlar təkcə məlumat ötürən texnoloji vasitələr deyil — onlar eyni zamanda, istəmədən də olsa, sosial davranış nümunəsi formalaşdıra bilirlər. Nəzakətli danışan robot uşaqlar üçün davranış modeli rolunu oynaya və onların kommunikasiya bacarıqlarının inkişafına təsir edə bilər.

Poliqon.info