Durov: Fransanın Çarli Kirkin qətlinə aidiyyəti olması versiyası inandırıcı görünür...

Telegram messencerinin yaradıcısı Pavel Durov ABŞ-də tanınmış aktivist Çarli Kirkin qətli ilə bağlı Fransanın mümkün iştirakına dair yayılan versiyanı “inandırıcı” hesab etdiyini bəyan edib. 

Poliqon xəbər verir ki,  Durov bu barədə X sosial şəbəkəsində paylaşım edərək, məsələ ətrafında gedən müzakirələrə münasibət bildirib.

Durov qeyd edib ki, Çarli Kirk özü də bir zamanlar Fransa hökuməti tərəfindən ona qarşı irəli sürülmüş ittihamlar geri götürülənədək bu ölkədən idxala 300 faiz vergi tətbiq olunmasını təklif etmişdi. Onun sözləri ABŞ-də baş verən hadisə ilə Fransanın münasibəti arasında müəyyən gərgin fonun olduğunu göstərir.

Bu açıqlama amerikalı jurnalist Kendis Ouens tərəfindən səsləndirilmiş iddialara cavab olaraq verilib. Ouens iddia edir ki, Kirkə qarşı sui-qəsddə Fransanın mümkün rolu barədə ona “yüksək vəzifəli fransız rəsmisi” məlumat verib. Jurnalistin dedikləri həm ABŞ, həm də Fransada rezonans doğurub.

Xatırladaq ki, Çarli Kirk sentyabrın 10-da Yuta ştatının universitetindəki çıxışı zamanı güllələnərək qətlə yetirilib. O, ABŞ prezidenti Donald Trampın tərəfdarı kimi tanınırdı və ölümündən sonra Prezidentin Azadlıq Medalı ilə təltif olunub. Hadisə ilə bağlı 22 yaşlı Tayler Robinsona rəsmi ittiham irəli sürülüb, lakin cinayətin motivi və mümkün təşkilatçı dairələr haqqında müzakirələr hələ də davam edir.

Hadisə həm ABŞ siyasi dairələrində, həm də beynəlxalq mediada ciddi mübahisələrə səbəb olub. Bir çox müşahidəçilər bu cür iddiaların sübut olunmadan səsləndirilməsinin siyasi münasibətləri daha da gərginləşdirə biləcəyini bildirir.

Poliqon.info