Avropa Trampın Ukrayna planına qarşı öz təkliflərini təqdim edib

Poliqon xəbər verir ki, The Washington Post qəzeti ABŞ, Ukrayna və Rusiya nümayəndələrinin bu gün Cenevrədə keçirəcəyi görüş ərəfəsində Avropanın Tramp administrasiyasının hazırladığı 28 maddəlik sülh planına qarşı öz kontur təkliflərini formalaşdırdığını yazıb. Nəşrin əldə etdiyi sənədin surətinə əsasən, Avropa ölkələri Ukrayna Silahlı Qüvvələrinin fəaliyyətinə hər hansı məhdudiyyət qoyulmasını qəbul etmir və bu müddəanı danışıqların əsasında görmür.

Sənədə görə, Kiyev Zaporojye Atom Elektrik Stansiyasına və Kaxovka su anbarına yenidən tam nəzarəti bərpa etməli, həmçinin Dnepr çayı boyunca “maneəsiz keçid” əldə etməlidir. Bundan başqa, Ukrayna Kınburn dili üzərində də nəzarəti bərpa etməli, digər mübahisəli ərazi məsələləri isə atəşkəsdən sonra ayrıca danışıqlar çərçivəsində həll olunmalıdır.

Avropanın təklifləri göstərir ki, Aİ ölkələri təhlükəsizlik zəmanətləri və ərazi bütövlüyü məsələlərində Kiyevin “qırmızı xətləri”nə sadiqdir. The Washington Post yazır ki, Cenevrə görüşünə Fransa, Almaniya və Böyük Britaniya da daxil olmaqla yüksək vəzifəli Avropa rəsmiləri qoşulacaq. Onların iştirakı danışıqlara əlavə siyasi çəki verəcək və Avropanın prosesdə passiv müşahidəçi olmaq niyyətində olmadığını nümayiş etdirəcək.

Poliqon.info