Şatdaun ABŞ-də iqtisadiyyata həftəlik 15 milyard dollara başa gələ bilər

Poliqon xəbər verir ki, ABŞ administrasiyası hökumətin bağlanmasının (şatdaun) ölkə iqtisadiyyatına həftəlik təxminən 15 milyard dollara başa gələcəyini hesablayır. Politico yazır ki, Ağ Ev bu proqnozu respublikaçı qanunvericilərə təqdim etməyi planlaşdırır.

ABŞ prezidenti Donald Trampın iqtisadi müşavirlərinin hesablamalarına görə, əgər şatdaun bir ay davam edərsə, ölkədə işsizlik göstəricisi 43 min nəfər artacaq, istehlak xərcləri isə 30 milyard dollar azalacaq. Bu rəqəmlər təxminən 1,9 milyon federal qulluqçunun məzuniyyətə göndərilməsi və ya maaşsız işləməsi kimi amilləri nəzərə almır.

Xatırladaq ki, federal hökumət 1 oktyabr tarixindən etibarən fəaliyyətini qismən dayandırıb. Səbəb Konqresdə respublikaçılar və demokratlar arasında büdcə xərcləri ilə bağlı razılıq əldə edilməməsidir. Hər iki tərəf baş verənlərə görə bir-birini siyasi məqsədlər güdməkdə ittiham edir.

Ekspertlər bildirirlər ki, uzunmüddətli şatdaun ABŞ iqtisadiyyatının ümumi sabitliyinə mənfi təsir göstərə, investorların etimadını azalda və gələcək fiskal siyasətdə daha dərin böhranlara yol aça bilər.

Poliqon.info