Fransada “Milli Birlik” partiyası növbədənkənar seçkilərə hazır olduğunu açıqlayıb

Poliqon xəbər verir ki, Fransanın ifrat sağçı “Milli Birlik” partiyası (RN) yeni seçkilərə hazır olduğunu bəyan edib. Bloomberg-in məlumatına görə, partiya liderləri Marin Le Pen və Jordan Bardella hazırkı hökumətin sentyabrın 8-də keçiriləcək etimad səsverməsindən sonra dağılacağına inanırlar.

Le Pen və Bardella baş nazir Fransua Bayru ilə görüş zamanı mövqelərini açıq şəkildə ifadə ediblər. Bayru bu həftə müxtəlif partiyalarla danışıqlar apararaq, etimad səsverməsindən sonra hakimiyyətdə qalmağa çalışır. Lakin Le Pen görüşdən sonra jurnalistlərə deyib: “Bu gün keçirilən məsləhətləşmələr heç nəyə gətirməyəcək. Biz Bayrunun təklifləri ilə tamamilə razı deyilik, çünki onlar ya mövzudan kənardır, ya da zərərlidir”. Onun sözlərinə görə, büdcə ilə bağlı danışıqlar da çıxılmaz vəziyyətə düşüb.

Millətçi RN partiyası hal-hazırda Milli Assambleyada ən çox yerə sahibdir və proqnozlara əsasən, növbədənkənar seçkilərin ilk turunda birinci yeri tutacaq. Bu səbəbdən Le Pen və Bardella hökumətin istefasının qaçılmaz olduğunu vurğulayırlar.

Eyni mövqeni solçu partiya da bölüşür. Onlar da Milli Assambleyada güclü qüvvədir və Bayru hökumətinin günlərinin sayılı olduğunu bəyan edirlər. Bu isə Fransada siyasi böhranın daha da dərinləşdiyini göstərir.

Poliqon.info