Hind mahnılarının mahir ifaçısı, Xalq artisti Elmira Rəhimovanın doğum günüdür

Oxu.Az xatırladır ki, Elmira Rəhimova 1941-ci ildə Bakıda dünyaya göz açıb.

1965-ci ildə Azərbaycan Dövlət Musiqi Texnikumunu, 1970-ci ildə isə Azərbaycan Dövlət Dillər İnstitutunu bitirib.

O, 1956-cı ildən Azərbaycan Dövlət Filarmoniyasının və Azərbaycan Teleradio Verilişləri Şirkətinin solistidir.

Elmira Rəhimova 1950-ci illərin sonunda hind mahnılarının ifaçısı kimi tanınıb, Hindistanın sabiq baş naziri Cəvahirləl Nehrunun dəvəti ilə iki dəfə (1957-1959, 1961) Hindistanda olub, hind mahnı və rəqslərini öyrənib. Azərbaycan bəstəkarlarının mahnılarını özünəməxsus ustalıqla ifa edib.

Hindistanda keçən günlər Elmira Rəhimovanın həyatında unudulmaz xatirəyə dönüb. O, burada Cəvahirləl Nehru, onun qızı İndira Qandi, eləcə də məşhur kino ulduzları Raç Kapur, Qopal, Nərgiz və digər tanınmış simalarla tanış olub.

Hindistan şahzadəsinin ona elçi düşməsi isə o dövrdə Azərbaycanda səs-küyə səbəb olub. Amma Elmira Rəhimova öz vətənində - Azərbaycanda ailə qurmağa üstünlük verib.

Dünyanın 60-dan çox ölkəsində konsert proqramları ilə çıxış edən sənətkar 1982-ci ildə Hindistanda keçirilən festivalın laureatı olub.

E.Rəhimova Azərbaycan bəstəkarlarının mahnılarını özünəməxsus ustalıqla ifa edib. Onun oxuduğu "Ana laylası", "Küsüb məndən", "Sənin gülüşlərin", "Mən anayam" və s. kimi mahnıları müğənniyə əbədi şöhrət qazandırıb.

O, 1959-cu ildə "Əməkdə fərqlənməyə görə" medalı ilə təltif olunub. 1967-ci ildə "Azərbaycan SSR əməkdar artisti" fəxri adını alan Elmira Rəhimovaya 1979-cu ildə Azərbaycan SSR Ali Sovetinin Fəxri fərmanı verilib.

2000-ci ildə "Azərbaycan Respublikasının xalq artisti" fəxri adına layiq görülən Elmira Rəhimova 2002-ci ildə Azərbaycan Respublikası Prezidentinin fərdi təqaüdçüsü olub.

Anand adında bir oğlu və iki nəvəsi var.

Poliqon.info