Deputat: "Xarici qonaqlar da gördülər ki, insanlarımız küçədə gecə yarısınadək böyük həvəslə qartopu oynayırlar..."

“Azərbaycana qar az-az yağır. Xüsusilə gənclər qarı həvəslə gözləyirdilər. Paytaxtda da qar gec də olsa, yağdı. Müəyyən qədər yollarda problemlər yaransa da, böyük problem olmadı. Dövlətimiz əvvəlcədən tədbir görüb, yeni texnikalar alınıb, qarlı havada yollar təmizlənir. Ölkədə xarici qonaqlar var, ötən gün onlarla birlikdə idik. Qonaqlar da gördülər ki, doğrudan da, insanlarımız küçədə gecə yarısınadək böyük həvəslə qartopu oynayırlar. Mərkəzdən kənarda xırda problemlər ola bilər, çünki bölgəmiz bu cür soyuqları, qarı az görür. Cüzi problemlərdir, Allaha şükür, hər şey yaxşıdır”.

Bu sözləri Pravda.az-a açıqlamasında Milli Məclisin deputatı Cavanşir Paşazadə deyib.

Deputat Bakı Şəhər İcra Hakimiyyətinin və digər aidiyyəti qurumların tənqid edilməsinə də münasibət bildirib: “Bir az tənqid etməyə, özümüzdən başqa heç kimi bəyənməməyə meyilliyik. Hər kəsin işinin çətinlikləri, problemləri var. Təbii ki, bu boyda şəhərə rəhbərlik etmək, bütün ölkədə problemləri 1 saatda həll etmək, insanları, texnikanı səfərbər etmək bir az çətin olar. Diqqət yetirilməyən bölgələrdə insanlar narazılıq edə bilərlər. Bu da təbiidir. Narazılıq canımızda var. Yaxşı işləri qiymətləndirməmək, tərif deməmək, hər şeydə pisi görmək... Allahın izni ilə, hər şey yaxşı olar”.

Poliqon.info