Şoyqunun qızı Rusiyanın Ukraynanya hücum etməsindən bir gün əvvəl Dubaya uçub

Poliqon xəbər verir ki, bu barədə "Agentstvo News" nəşri məlumat yayıb. Nəşr yazır ki, Kseniya Şoyqu 2022-ci il fevralın 23-də günortadan sonra - müharibənin başlamasına 14 saat qalmış ölkədən çıxıb.

Nəşr sərhəd-keçid bazasından sızan sənədə istinad edib. Ümumilikdə, Rusiya Federasiyası ilə Ukrayna arasında müharibə başlayandan bəri Şoyqunun qızı 7 dəfə Birləşmiş Ərəb Əmirliklərinə uçub.

"Kseniya Şoyqu Şeremetyevodan BƏƏ-nin paytaxtı Əbu-Dabiyə 2022-ci il fevralın 23-də, saat 15:50-də uçub. O, "Etihad" aviaşirkətinin müntəzəm reysindən istifadə edib. Ertəsi gün saat 6:00-da Kreml Vladimir Putinin müharibənin başlanması ilə bağlı mesajını dərc edib. Sızdırılan məlumatlara görə, Şoyqunun qızı bir gün ərzində, fevralın 25-də saat 14:25-də Rusiyaya qayıdıb. Sergey Şoyqu Rusiyanın Ukraynaya hücumunun dəqiq tarixini bilən rus isteblişmentinin azsaylı nümayəndələrindən biri idi", deyə nəşr qeyd edib.

Maraqlıdır ki, Kseniya Şoyqu 2020-ci ildən Rusiya Triatlon Federasiyasına rəhbərlik edir. Bundan əlavə, o, "Qəhrəmanların yarışı" idman yarışlarının təşkili ilə məşğul olur.

"2022 və 2023-cü illərdə o, Vladimir Putin üçün Kronştadtda yaradılan "Fort Island" turizm və rekreasiya klasterinə ekskursiya təşkil edib. Kremlin saytı onu klasterin yaradılması layihəsinin ofisinin rəhbəri kimi təqdim edib", deyə agentlik vurğulayıb.

Şoyqunun qızının səyahətlərinin üzə çıxdığı məlumat bazasının eyni sızmasından məlum olub ki, Çeçenistan rəhbəri Ramzan Kadırovun qızları Karina, Tabarık və Hedi 2017-ci ildə Fransaya getmək üçün başqa soyadlı pasportlardan istifadə ediblər. Onlar Parisə atalarının "Airbus ACJ319" biznes təyyarəsi ilə uçublar və göyərtəsində ən azı 21 nəfər olub.

Sərnişinlər arasında Musayeva soyadlı pasportdan istifadə edən Çeçenistan rəhbərinin üç qızı da olub, hər üçünün atasının adının qrafasında "Ramzanovna" yazılıb. Maraqlıdır ki, sızan məlumatlara görə, bütün bu pasportlar hələ də qüvvədədir.

Poliqon.info