Böyük Britaniyanın silah ixracı 2022-ci ildə əvvəlki ilə nisbətən iki dəfə artaraq rekord həddə - 8,5 milyard funt-sterlinqə çatıb...
Poliqon Anadolu Agentliyinə istinadən xəbər verir ki, silah ticarətinə qarşı mübarizə aparan Böyük Britaniya mərkəzli Silah Ticarətinə Qarşı Kampaniya təşkilatının təhlilinə əsasən, krallığn silah ixracı iki illik azalmadan sonra 2022-ci ildə artıb.
Silah satışı, açıqlanan satış məlumatları ilə ən geniş ixrac edilən növ olan vahid fərdi ixrac lisenziyaları (SIELs) əsasında hesablanıb.
Ölkənin silah ixracı keçən il 8,5 milyard funt-sterlinqə çatıb ki, bu da bu sahədə məlumatların yayımlanmağa başladığı 2000-ci illərin əvvəlindən bəri ən yüksək səviyyədir. Ötən il silah ixracı 2021-ci ilə nisbətən iki dəfə artıb.
Böyük Britaniyanın ən çox silah ixrac etdiyi ölkə 2,7 milyard funt-sterlinqlə Qətər olub. İlki 2022-ci ilin avqustunda təhvil verilən "Typhoon" tipli döyüş təyyarələrinin ixracı Qətərə silah ixracının 2,4 milyard funt-sterlinqini təşkil edib.
Qətəri 1,1 milyard funt-sterlinqlə Səudiyyə Ərəbistanı və 860 milyon funt-sterlinqlə ABŞ izləyib. İngiltərənin ötən il Türkiyəyə silah ixracı 424 milyon funt-sterlinq, Ukraynaya isə 401 milyon funt-sterlinq təşkil edib.
Poliqon.info