Ukrayna ordusunun yaz hücumu hardan və necə olacaq?

Ukrayna Silahlı Qüvvələrinin yaz hücumu raket hücumu ilə başlaya bilər, ardınca tanklardan istifadə etməklə kütləvi hücum baş verə bilər, bundan sonra döyüş meydanında piyadalarla zirehli transportyorlar peyda olacaq.

Poliqon xəbər verir ki, The Wall Street Journal nəşrinə müsahibə verən hərbi ekspertlər belə bir proqnoz veriblər. Onlar öz analizlərində Ukrayna ordusunun imkanlarını və onun hərbçilərinin NATO ölkələrində hazırlığını nəzərə alıblar. Analizdə qeyd edilir ki, Ukrayna hərbçiləri Krıma gedən quru “körpünü” eyni vaxtda iki yerdə kəsəcəklər.

Kiyevin Ukrayna üzərindəki hava məkanına nəzarət etmədiyi və hava hücumu həyata keçirmək üçün kifayət qədər təyyarəsi olmadığı üçün hücumun dəqiq idarə olunan raket və artilleriyadan istifadə etməklə kütləvi bombardmanla başlaması ehtimal olunur.

Nəşrin proqnozuna görə, bunun ardınca quru qoşunlarının genişmiqyaslı hücumu olacaq. Bu cür taktikalar NATO-nun hücum əməliyyatlarına bənzəyir. Lakin Ukrayna hazırda alyansın əməliyyatları üçün lazım olan müasir texnikaya malik deyil. Çünki vəd edilmiş tankların çoxu, o cümlədən “M1 Abrams” Ukraynaya hücum əməliyyatından sonra çatacaq.

Ona görə də Kiyev müasir Qərb tanklarını özünün Sovet istehsalı olan tankları ilə bacarıqla birləşdirməli olacaq. Qəzet qeyd edir ki, sonuncular bir sıra parametrlərə görə Qərb tanklarından daha aşağıdır, lakin bir neçə yüz sovet tankının çoxu Ukrayna tərəfindən modernləşdirilib və müasir avadanlıqla təchiz edilib.

WSJ yazır ki, tank hücumu Kiyevə çatdırılan zirehli transportyorlardakı piyada birləşmələri, o cümlədən American Strykers tərəfindən dəstəklənəcək.

“Zərbənin ən çox ehtimal olunan istiqaməti ölkənin cənub-şərqidir, burada Ukrayna Silahlı Qüvvələri Rusiyanı Krımla birləşdirən quru dəhlizini kəsməyə cəhd edə bilər. Ukrayna ordusu paralel olaraq Zaporojye vilayətindən Melitopol, Azov dənizi və Rusiyaya doğru hərəkət edə bilər”, deyə Sent Endryus Universitetinin strateji tədqiqatlar professoru Filip O'Brayn bildirib. O əlavə edib ki, tezliklə başlanacaq hücumda Ukrayna ordusuRusiyanın təchizat xətlərini kəsməyə kömək edə biləcək uzaqmənzilli silahlarına malik olmayacaq.

Madison Siyasəti Forumunun şəhər müharibəsi tədqiqatları departamentinin direktoru Con Spenser isə bildirib ki, Qərbin hərbi dəstəyini indiki səviyyədə saxlamaq üçün, tankların əksəriyyətinin hələ çatdırılmadığı indiki şəraitdə Kiyev görünən irəliləyiş əldə etməlidir. Onun fikrincə, ukraynalılar Ukrayna Silahlı Qüvvələrinin keçmiş iri hücumlarında olduğu kimi, Rusiya müdafiəsində zəif nöqtələr tapmaq və onlara qarşı dəqiq zərbələr endirmək taktikasından istifadə etməyə davam edəcəklər. O'Brayn isə deyib ki, bu cür taktikalardan istifadə etmək olar. Bir sıra analitiklər qeyd ediblər ki, Rusiya Zaporojyedə müdafiə xətləri çəkib və bu, zəif nöqtələri tapmaq taktikasını kütləvi hücumdan daha sərfəli edir.

WSJ qeyd edir ki, Ukrayna qoşunları daha yaxşı motivasiyalı və tez-tez daha yaxşı silahlanmış olsa da, Rusiyanın müdafiəyə hazırlaşmaq üçün bir neçə ay vaxtı var idi və Rusiya komandanlığı artıq göstərdi ki, məqsədlərinə çatmaq üçün ağır can və texnika itkisinə hazırdırlar. Polşanın baş naziri Mateuş Moravecki də qəzetə qarşıdakı hücumun "çox, çox çətin" olacağını söyləyib. “Rusların böyük potensialını və kobud gücünü qiymətləndirməmək olmaz”, deyə Polşa lideri bildirib.

Ukrayna Milli Strateji Araşdırmalar İnstitutunun analitiki Mykola Beleskov WSJ-yə bildirib ki, hər iki tərəf müharibənin başlamasından bir il sonra döyüş əməliyyatlarının intensivliyini saxlamaq üçün lazım olan resursları səfərbər etmək problemi ilə üzləşib. Bununla belə, onun fikrincə, Baxmut yaxınlığında rus qüvvələrinin tükənməsi Ukraynaya “hücum üçün unikal fürsət pəncərəsi” verə bilər.

Poliqon.info