Gənc şair Rəşad Məcidi, Qənirə Paşayevanı tənqid etdi

Azərbaycan Yazıçılar Birliyinin üzvü, Prezident təqaüdçüsü, şair Emil Rasimoğlu sosial şəbəkə ünvanında tanınmış jurnalist Aydın Canıyevə qarşı olan diqqətsizlikdə Azərbaycan Mətbuat Şurasını, Milli Məclisin Mədəniyyət Komitəsini eləcə də onların sədrləri Rəşad Məcidi, Qənirə Paşayevanı tənqid edib:

«Bu günlərdə 55 yaşını tamamlayan Aydın Canıyevə olan diqqətə baxanda adam Azərbaycan mətbuatının durumundakı çox "qaranlıqlar"ın cavabını bir daha təstiqləyir...

Məsələ onda deyil ki, Aydın Canıyev yubiley yaşına görə yad olunmadı, ona ehtiram göstərilmədi. Yox, əsla! Gördüyüm qədərilə yetərincə yad da edildi, ehtiram da göstərildi.

Məsələ ondadır ki, dövlət adına bir qurum tərəfindən belə bir təbrik məktubuna da layiq görülmədi (nəin ki, fəxri ad, ev və.s). Hansı ki, bütün bunlar Aydın Canıyevin illər öncəki haqqıdır!

Azərbaycan Mətbuat Şurası, Milli Məclisin Mədəniyyət Komitəsi ömrünü-gününü çağdaş jurnalistikaya həsr edən bir adama bu qədər uzaqdan niyə baxıb, görməzdən gəlməlidir ki...Axı, o, AYDIN CANIYEVdir!

İstər Mətbuat Şurası, istərsə də Milli Məclisin Mədəniyyət Komitəsi olaraq Rəşad Məcid üçün, Qənirə Paşayeva üçün bir təbrik məktubu ilə istedadı dəyərləndirmək çətin idimi? Mən hələ ölkə başçısına təqdimat yazmağı demirəm (hansı ki, Aydın Canıyev imzası üçün o da mütləqdir!).

Nəyi gözləyirik, ölümünü? Onsuz da haqqı kəsilə-kəsilə adam yaşadığı şəhərdən doğulduğu kəndə qədər gedib çıxıb...

O, bu şəhərə yaşaya-yaşaya yazmağa gəlmişdi...indisə o kəndə yaza-yaza ölməyə gedib.

Amma...hələ ki, gec deyil, hələ ki, sağdı!»

Poliqon.info