İsrailin Ukraynaya hərbi yardım imkansızlığı…

İsrailin baş naziri Benyamin Netanyahu bildirib ki, onun ölkəsi Rusiya ilə Suriya üzrə razılaşma fonunda Ukraynaya dəstək məsələlərində məhdud imkanlara sahibdir.

Poliqon.info xəbər verir ki, İsrailin Baş naziri bunu Almaniya kansleri Olaf Şolzla danışıqlardan sonra keçirilən mətbuat konfransında bildirib.

“Açığını deməliyəm, çətin vəziyyətimiz var. İsrail və Rusiya pilotları Suriya hava məkanında bir-birinə yaxın uçurlar”, deyə Netanyahu bildirib.

Baş nazir Rusiya tərəfi ilə müəyyən razılaşmaların əldə olunduğunu etiraf edib: “Biz razılaşdıq ki, bir-birimizin təyyarələrini vurmayacağıq. Bizdən fərqli olaraq, Avropa ölkələrinin belə bir öhdəçiliyi yoxdur”.

Netanyahu bildirib ki, bu məhdudiyyətlər fonunda İsrail hələ də Ukraynaya humanitar yardım göstərməyə çalışır. Həmçinin, onun sözlərinə görə, Təl-Əviv Kiyevə mülki müdafiə və erkən xəbərdarlıq sistemləri sahəsində kömək edir.

Qeyd edək ki, fevralın əvvəlində Netanyahu bildirmişdi ki, Rusiya prezidenti Vladimir Putinlə danışıqlar zamanı İsrailin maraqlarına xidmət edən və Rusiyanın Yaxın Şərqdəki milli maraqlarını pozmayan kompromis əldə olunub. Siyasətçi qeyd edib ki, onun ölkəsi Rusiya ilə qarşıdurmanı və Suriyanın hava məkanında iki dövlətin hərbi təyyarələri arasında insidentlərin olmasını istəmir.

Poliqon.info