ABŞ prezidenti Co Bayden ABŞ-ın bank sistemini təhlükəsiz adlandırıb…
Poliqon.info xarici mətbuata əsasən xəbər verir ki, ABŞ prezidenti bu barədə vətəndaşlara müraciətində bildirib. Bayden Kaliforniyanın “Silicon Valley Bank”ının və Nyu-Yorkun “Signature Bank”ının iflasından sonra bank tənzimləmələrini sərtləşdirəcəyini vəd edib.
“Amerikalılar bank sisteminin sağlam olduğuna əmin ola bilərsiniz. Sizin əmanətlərinin orada təhlükəsiz olacaq” deyə Bayden qeyd edib.
ABŞ prezidenti vergi ödəyicilərinin heç bir itkiyə məruz qalmayacağını söyləyib. Prezident bildirib ki, bank böhranının həlli üçün vəsait Əmanətlərin Sığortalanması Fondundan daxil olacaq.
Baydenin sözlərinə görə, iflas edən bankların rəhbərliyi məsuliyyətə cəlb olunacaq. O, həmçinin bank investorlarının "şüurlu şəkildə riskə getdiyini" qeyd edərək, onları müdafiə etməkdən imtina edib.
“Risk nəticə verməyəndə, investorlar pullarını itirirlər. Kapitalizm belə işləyir”, deyə prezident bildirib.
Bayden gələcəkdə vəziyyətin təkrarlanmaması üçün yeni bank tənzimləmə tədbirlərini də açıqlayıb. Xüsusilə, o, Konqresdən Donald Trampın prezidentliyi dövründə ləğv edilmiş bank qaydalarını bərpa etməyi xahiş etmək niyyətindədir.
“Mənim administrasiyamda heç kim qanundan üstün deyil” deyə prezident vurğulayıb.
Poliqon.info