Çin ABŞ-ın Asiyada NATO versiyasını yaratmağa çalışdığını bildirib

Asiya ölkələri ABŞ-ın Hind-Sakit okean strategiyası adlanan strategiyanı həyata keçirməsi fonunda Ukrayna ssenarisinin təkrarlanmasına imkan verməməlidir.

Poliqon.info xəbər veriri ki, bunu çərşənbə axşamı, martın 7-də Ümumçin Xalq Nümayəndələri Yığıncağının (Çin parlamenti) iclası çərçivəsində keçirilən illik mətbuat konfransında Çinin xarici işlər naziri Tsin Qan bildirib.

Nazir qeyd edib ki, ABŞ bu strategiyanın azadlığı və aşkarlığı gücləndirmək məqsədi daşıdığını sübut etməyə çalışsa da, əslində bu strategiya qarşıdurmaya yönəlib.

“Bizim Asiya-Sakit Okean Regionumuz Asiyada qarşılıqlı faydalı əməkdaşlıq arenasına çevrilməlidir. Biz Ukrayna böhranının Asiyada təkrarlanmasına imkan verə bilmərik”, Çinin xarici işlər naziri bildirib.

Tsin Qan əmindir ki, Vaşinqton regionda münaqişəli blokların formalaşmasına yardım edir və bu, NATO-nun Asiyada versiyasının yaradılmasına və Asiya-Sakit okean regionu ölkələri arasında əlaqələrin kəsilməsinə gətirib çıxaracaq.

Həmçinin Çin Xarici İşlər Nazirliyinin rəhbəri ABŞ-ı gücdən sui-istifadədə və beynəlxalq hüquqa məhəl qoymamaqda ittiham edib. Nazir əlavə edib ki, ABŞ təsvir olunan yanaşmanı dəyişməsə, bu, dövlətlər arasında qarşıdurmaya səbəb olacaq.

Poliqon.info