Mayk Conson: İranda baş verənlər müharibə deyil, məhdud hərbi əməliyyatdır...

Poliqon xəbər verir ki, ABŞ Konqresinin Nümayəndələr Palatasının spikeri Mayk Conson Vaşinqtonun İrana qarşı həyata keçirdiyi hərbi fəaliyyətlərin müharibə deyil, məhdud və qısa müddətli əməliyyat olduğunu bəyan edib.

Onun sözlərinə görə, ABŞ Müdafiə Nazirliyi bu əməliyyatın miqyas və müddət baxımından məhdud olduğunu və konkret məqsədlərə yönəldiyini açıq şəkildə bildirib.

“Tam aydındır ki, Müdafiə Nazirliyi dəqiq şəkildə bəyan edib ki, İranda baş verənlər müharibə deyil, məhdud əməliyyatdır. Bu əməliyyatın çox konkret məqsədi var və bütün qiymətləndirmələrə görə həmin məqsədə demək olar ki, artıq nail olunub”, – deyə Mayk Conson bildirib.

Spiker qeyd edib ki, ABŞ-nin əsas hədəflərindən biri İranın ballistik raket potensialını zəiflətmək və yeni raket istehsalı imkanlarını məhdudlaşdırmaq olub.

Onun sözlərinə görə, İran bu silahları böyük miqyasda və sürətlə istehsal edirdi və bu vəziyyət ABŞ və onun regiondakı müttəfiqləri üçün ciddi və qaçılmaz təhlükə yaradırdı.

Mayk Conson əlavə edib ki, əməliyyatın digər mühüm məqsədi İranın hərbi-dəniz qüvvələrinin potensialını zəiflətmək idi. Spikerin sözlərinə görə, bu istiqamətdə həyata keçirilən tədbirlər də uğurlu nəticə verib.

ABŞ rəsmisinin açıqlamasına görə, əməliyyatın gedişi Vaşinqton tərəfindən müsbət qiymətləndirilir və müəyyən edilmiş hərbi məqsədlərin böyük hissəsinin artıq yerinə yetirildiyi hesab olunur.

Poliqon.info