Böyük Britaniyanın Milli Kriminal Agentliyi (NCA) yanvarın 31-də Azərbaycanlı deputat Cavanşir Feyziyevin ailəsinə məxsus olduğu bildirilən ümumilikdə 5,6 mln. funtluq hesaba həbs qoyulduğu barədə məlumat dərc edib.
“Cinayətkarlığa qarşı mübarizə üzrə Milli Agentliyin bank hesablarında olan pulun mənşəyini araşdırmasından sonra milyonlarla funt müsadirə edilib. Müstəntiqlər Böyük Britaniyada Azərbaycan parlamentinin fəaliyyətdə olan deputatı Cavanşir Feyziyevin ailə üzvlərinə məxsus hesablarda 5,6 mln. funt sterlinqin müsadirəsi üçün order verilməsinə müvəffəq olublar”, deyə press-relizdə bildirilir.
Araşdırma zamanı Feyziyevin ailə üzvlərinin adına olan hesabların dondurulması haqqında altı sərəncam verilib. Müstəntiqlər vəsaitin Estoniya və Latviyadan saxta şirkətlər vasitəsilə yuyulduğunu hesab edirlər. Bu köçürmələrin bir hissəsi əməliyyatın qanuniliyini təsdiq edən müqavilələrlə müşaiyət olunub. Amma Londonun Vestminster məhkəməsində üç həftə davam edən prosesdən sonra hakim Con Zani bildirib ki, “bu sənədlərin tamamilə saxta olduğunun və əsas pulların yuyulmasını ört-basdır etmək üçün hazırlandığının təkzibolunmaz dəlilləri var”.
Dondurulmuş vəsaitin ümumi məbləği 15,3 mln. funt sterlinq təşkil edib, onun üçdə birini – 5,6 mln. funt sterlinqini məhkəmə müsadirə edib.
Hakimiyyət araşdırmaya başladıqda və hesablar dondurulduqda Feyziyevin nümayəndəsi NCA-nın pulların qanunsuz mənşəyi haqqında bütün iddialarını təkzib edib, ittiham tərəfin bütün dəlillərini isə əsassız adlandırıb.
Ailə üzvləri iddia ediblər ki, onların sərvətləri Cavanşir Feyziyevin qanuni biznes fəaliyyətindən əldə edilib. Onlar “Regents” parkının yanındakı “Cumberland Terrace”də aldıqları milyonlarla funtluq evin pulunu da ordan ödədikləırini deyiblər.
Buna baxmayaraq, hakimi Con Zani üçlüyün dondurulmuş bank hesablarında saxlanılan 15,3 milyon funt sterlinqin 5,6 milyon funt-sterlinqinin müsadirə olunmasına dair qərar çıxarıb.
Müsadirə olunan pulun böyük hissəsi 4,4 milyon funt-sterlinqi xanım Feyziyevaya məxsusdur. Deputatın oğlu Orxanın 1 milyon funt-sterlinqi, Elmanın da 240.000 funt-sterlinqi müsadirə ediləcək.
Qeyd edək ki, cinayət araşdırıması tam yekunlaşmadığına görə depozitdə qalan vəsait bütüövlükdə dondurulub, malikanəyə də əl qoyulub.
PIA.az xəbər verir ki, deputat Cavanşir Feyziyevin Londonda əmlakının müsadirə olunmasına tanınmış ictimai fəal Bəxtiyar Hacıyev də münasibət bildirib. Bəxtiyar Hacıyev Cavnşir Feyziyevin Azərbaycandakı korrupsiya sisteminin kiçik fiqurlarından biri olduğunu vurğulayaraq qeyd edir ki, xaricə qeyri-qanuni yollarla daşınmış milyardlar başqa ölkələr tərəfindən müsadirə ediləndə bu kasıb xalqı daha çox yandıracaq:
“Bloomberg və digər nüfuzlu nəşrlər yazırlar ki, Böyük Britaniyanın Cinayətkarlıqa Mübarizə üzrə Milli Agentliyi (NCA) Azərbaycan deputatı Cavanşir Feyziyevin ailəsinə məxsus olan 5.6 milyon funt sterlinqi (təxminən 13 milyon manat) müsadirə edib. Hakim müstəntiqlərin təqdim etdikləri sənədlərə baxaraq qərar verib ki, bu pullar çirkli, qeyri-qanuni yollarla Britaniyaya daşınıb.
Cavanşir Feyziyev Azərbaycanda dərman monopoliyasında payı olan şəxslərdən sayılır. Təsəvvür edin, 10 manata satılmalı olan dərmanlar sırf monopoliyaya görə 23 manata satılır, hər dərmandan qalan 13 əlavə manatla 1 milyon insanın artıq ödədiyi pul bir anda Britaniyanın hesabına keçir. Nə xalqı öz haqqını əldə etməyə qoymurlar, nə də özləri yeyə bilmirlər. Təqaüdçü Rafiq kişinin haqqını siyasətçi İvandan tutmuş müstəntiq Jeremyə qədər hamıya yedizdirirlər.
Cavanşir Feyziyev bu Laundromat sxemində ən balaca fiqurlardandır. Təsəvvür edin xaricə qeyri-qanuni yollarla daşınmış milyardlar başqa ölkələr tərəfindən müsadirə ediləndə kasıb xalqı necə yandıracaq...”.
pia.az
Digərxəbərlər
Populyar xəbərlər
