Kuba prezidenti terrorçu və muzdluların hücumlarına qarşı qətiyyətli mövqe açıqlayıb

Poliqon xəbər verir ki, Migel Dias Kanell sosial şəbəkə X hesabında paylaşdığı açıqlamada Kubanın heç bir ölkəyə qarşı aqressiv niyyət daşımadığını, lakin suverenliyə və milli sabitliyə yönələn istənilən terrorçu və muzdluluq xarakterli hücumlara qarşı qətiyyətlə müdafiə olunacağını bildirib. Dövlət başçısı vurğulayıb ki, rəsmi Havana ölkənin daxili işlərinə kənar müdaxilə cəhdlərini qəbul etməyəcək.

Prezident qeyd edib ki, Kuba öz suverenliyini və ictimai asayişini qorumaq üçün bütün zəruri addımları atmağa hazırdır. Onun sözlərinə görə, ölkə heç kimə hücum etmir və heç bir dövlət üçün təhlükə yaratmır, lakin milli təhlükəsizliyə yönələn hər hansı silahlı və ya terror xarakterli təşəbbüs cavabsız qalmayacaq.

Hadisə fevralın 25-də baş verib. Florida ştatında qeydiyyatdan keçmiş sürətli kater Kubanın ərazi sularına daxil olub. Kuba sərhədçiləri qayığa yaxınlaşarkən ekipaj tərəfindən atəş açıldığı bildirilir. Qarşıdurma nəticəsində katerdə olan dörd nəfər zərərsizləşdirilib, daha altı nəfər yaralanıb. Atışma zamanı Kuba sərhəd xidmətinin bir əməkdaşı da xəsarət alıb.

Kuba Daxili İşlər Nazirliyinin yaydığı məlumata görə, saxlanılan şəxslərin ABŞ-dən gəldiyi və onların ölkə ərazisində terror aktı törətməyi planlaşdırdıqları ehtimal edilir. Rəsmi açıqlamada bildirilir ki, insidentlə bağlı araşdırma aparılır və təhlükəsizlik tədbirləri gücləndirilib.

Eyni zamanda, Florida prokurorluğu da fakt üzrə araşdırmaya başladığını açıqlayıb. ABŞ tərəfi hadisənin bütün təfərrüatlarının müəyyənləşdirilməsi üçün hüquqi prosedurların həyata keçirildiyini bildirib.

Son insident Karib hövzəsində təhlükəsizlik məsələlərinin yenidən gündəmə gəlməsinə səbəb olub. Rəsmi Havana hadisəni ölkənin suverenliyinə qarşı təxribat kimi qiymətləndirir və beynəlxalq hüquq normalarına uyğun şəkildə öz ərazi bütövlüyünü qorumaqda israrlı olduğunu bəyan edir.

Poliqon.info