Kral III Çarlz ABŞ-də “çətin vəziyyətə” düşə bilər

Poliqon xəbər verir ki, bu barədə CNN telekanalı məlumat yayıb. Məlutda qeyd edilir ki, Böyük Britaniya kralı III Çarlzın ABŞ-yə planlaşdırılan səfəri Vaşinqtonla London arasında yaranan siyasi gərginlik fonunda müzakirə mövzusuna çevrilib.

Məlumata görə, ABŞ prezidenti Donald Trampın Böyük Britaniyanın baş naziri Kir Starmerin siyasətinə yönəlmiş sərt tənqidləri, xüsusilə Londonun İrana qarşı hərbi əməliyyata dəstək verməməsi səbəbilə vəziyyət daha da həssaslaşıb. Bu fonda Britaniya parlamentində bir sıra deputatlar kralın ABŞ səfərinin məqsədəuyğunluğunu sual altına alırlar.

İcmalar Palatasının Xarici İşlər Komitəsinin rəhbəri Emili Tornberri bildirib ki, III Çarlz səfər zamanı “çətin və narahat vəziyyətə” düşə bilər. O, səfərin təxirə salınmasının daha təhlükəsiz seçim ola biləcəyini vurğulayıb və qərarın diqqətlə qiymətləndirilməsinə çağırıb.

CNN-in məlumatına görə, Trampın gözlənilməz siyasi davranışı London üçün əlavə risklər yaradır. Britaniya hakimiyyəti kralın ABŞ-də ictimai tənqidlərə şahid olmasını istəmir, eyni zamanda səfərin ləğv edilməsinin Vaşinqtonun narazılığına səbəb ola biləcəyindən ehtiyat edir.

Analitiklər hesab edirlər ki, mövcud vəziyyət ABŞ və Böyük Britaniya arasında diplomatik münasibətlərdə incə balansın qorunmasını tələb edir. Kralın səfəri həm siyasi, həm də simvolik əhəmiyyət daşıdığından, onun taleyi yaxın günlərdə veriləcək qərarlardan asılı olacaq.

Poliqon.info