Kallas: Əgər silah vəd edirsinizsə, amma ödənişi başqasından gözləyirsinizsə, əslində heç nə vermirsiniz…

ABŞ Prezidenti Donald Trampın Ukraynaya böyük həcmdə Amerika silahları göndəriləcəyi ilə bağlı bəyanatına münasibət bildirən Avropa İttifaqının xarici siyasət və təhlükəsizlik üzrə ali nümayəndəsi Kaya Kallas bildirib ki, Vaşinqton bu məsələdə Avropa ilə məsuliyyəti paylaşmalıdır.

Poliqon xəbər verir ki, bu barədə Kallas 15 iyulda Brüsseldə keçirilən Aİ Xarici İşlər Nazirləri Şurasının iclasından sonra çıxışında deyib.

Kallas Trampın bəyanatını ümumən müsbət qarşılayaraq, “Biz prezident Trampın Ukraynaya silah göndərilməsi ilə bağlı verdiyi bəyanatı alqışlayırıq, amma istərdik ki, Birləşmiş Ştatlar bu yükü bizimlə bölüşsün”, deyə vurğulayıb. Bununla belə, Kallas Trampın mövqeyinə tənqidi yanaşaraq əlavə edib: “Əgər siz silah verəcəyinizi vəd edirsinizsə, amma onun pulunu başqası ödəməlidir, deyirsinizsə, əslində siz Ukraynaya silah təmin etmirsiniz”.

Qeyd edək ki, AFP Agentliyinin məlumatına görə, Fransa və İtaliya artıq Ukraynaya göndəriləcək Amerika silahlarının maliyyələşdirilməsində iştirak etməyəcəklərini bildiriblər. Bu isə Aİ daxilində mövzu ətrafında fikir ayrılıqlarının mövcud olduğunu göstərir.

Hazırda Avropa İttifaqı Ukraynaya dəstək siyasətində həmrəylik nümayiş etdirməyə çalışsa da, silah təchizatı və maliyyə məsələləri üzrə müxtəlif yanaşmalar, ABŞ-la münasibətlərin koordinasiyası baxımından problemlər yarada bilər.

Poliqon.info