İsrail Cənubi Livana daxil olub

Poliqon xəbər verir ki, İsrail Müdafiə Qüvvələri İran ərazisində davam edən hərbi əməliyyatlarla paralel olaraq Livanın cənubuna zərbələr endirir. İsrail ordusunun mətbuat xidməti bildirib ki, bu hücumlar “Şir nəriltisi” əməliyyatı ilə əlaqəli deyil və əsas məqsəd Livanın “Hizbullah” hərəkatına qarşı mübarizə aparmaqdır.

Rəsmi açıqlamada qeyd olunur ki, İsrail əsgərləri sərhəd yaxınlığında bir neçə mövqedə yerləşdirilib. Bu addım “ön müdafiə xəttinin gücləndirilməsi konsepsiyası” çərçivəsində həyata keçirilir. Hərbi qurumun məlumatına görə, hazırda İsrailin şimal bölgələrinin sakinləri üçün əlavə təhlükəsizlik səviyyəsi yaradılır. Zərbələr “Hizbullah”ın “terror infrastrukturu”na qarşı yönəlib və İsrail ərazisinə mümkün sızmaların qarşısını almaq məqsədi daşıyır.

Livanın Səhiyyə Nazirliyi isə son 24 saat ərzində İsrailin zərbələri nəticəsində 52 nəfərin öldüyünü, 154 nəfərin yaralandığını açıqlayıb. Hücumlara məruz qalan ərazilər arasında Cənah məhəlləsi və Burc əl-Bərajnə qəsəbəsi də var. “Hizbullah” cavab olaraq bir neçə İsrail hərbi bazasına zərbələr endirdiyini bəyan edib. İsrail tərəfi bu məlumatı hələlik təsdiqləməyib.

Fevralın 28-də ABŞ və İsrail İran ərazisinə raket zərbələri endirib. Buna cavab olaraq İran Yaxın Şərqdə yerləşən ABŞ hərbi bazalarına hücum edib. Bəhreyn, Qətər, Küveyt, Birləşmiş Ərəb Əmirlikləri, Oman və Səudiyyə Ərəbistanı İran tərəfindən mümkün hücumlara cavab verməyə hazır olduqlarını bildiriblər.

Regionda gərginliyin artması fonunda ekspertlər vəziyyətin daha genişmiqyaslı qarşıdurmaya çevrilə biləcəyi barədə xəbərdarlıq edirlər.

Poliqon.info