İranın ABŞ ilə yeni nüvə sazişi üzrə təklifləri məlum olub

İran rəsmiləri ABŞ ilə yeni nüvə sazişi üzrə danışıqların irəliləməsi məqsədilə bir sıra kompromis təkliflərini müzakirə edir.

Poliqon xəbər verir ki, bu barədə The Wall Street Journal mənbələrə istinadən yazır. Nəşrin məlumatına görə, Tehran uranın zənginləşdirilməsi prosesinin müvəqqəti dayandırılması, yüksək zənginləşdirilmiş uran ehtiyatlarının bir hissəsinin ölkə xaricinə göndərilməsi və ABŞ şirkətləri ilə biznes sazişlərinin bağlanması imkanlarını nəzərdən keçirir. Məqsəd Vaşinqtonla nüvə danışıqlarında irəliləyiş əldə etmək və mümkün ABŞ zərbəsinin qarşısını almaqdır.

Amerikalı və iranlı diplomatların sözlərinə görə, İran yüksək zənginləşdirilmiş uran ehtiyatlarının bir hissəsini Rusiyaya göndərməyə hazır olduğunu bildirib. Eyni zamanda, Tehran uranın zənginləşdirilməsini üç ilədək müddətə dayandırmaq niyyətini ifadə edib. Bildirilir ki, iyun ayında ABŞ-nin zərbələri nəticəsində İranın əsas nüvə obyektləri iflic vəziyyətə düşdükdən sonra ölkə faktiki olaraq zənginləşdirmə prosesini dayandırıb.

Məlumata əsasən, fevralın əvvəlində keçirilən ilk görüş zamanı İran daha bir təşəbbüs irəli sürüb. Belə ki, Tehran zənginləşdirilmiş urandan yanacaq lövhələrinin istehsalı üzrə regional konsorsiumun yaradılmasını təklif edib. İran tərəfi bu mexanizmin gələcəkdə ölkənin mülki nüvə proqramında istifadə oluna biləcəyini vurğulayıb.

Lakin diplomatlar qeyd edirlər ki, İslam Respublikası istehsal prosesinin ölkə daxilində saxlanılmasında israr edir. Bu isə ABŞ üçün qəbuledilməz hesab olunur və tərəflər arasında əsas fikir ayrılıqlarından biri kimi qalır.

Müşahidəçilərin fikrincə, tərəflərin mövqelərində müəyyən yumşalma əlamətləri olsa da, yekun razılaşmanın əldə olunması üçün hələ ciddi danışıqlar tələb olunur. Mövcud vəziyyət Yaxın Şərqdə təhlükəsizlik balansına və qlobal enerji bazarlarına birbaşa təsir göstərə biləcək əhəmiyyətli diplomatik proses kimi qiymətləndirilir.

Poliqon.info