İran prezidenti Əli Şəmxanini Müdafiə Şurasının katibi təyin edib

Poliqon xəbər verir ki, İran prezidenti Məsud Pezeşkian Ali dini lider Əli Xameneinin siyasi müşaviri, kontr-admiral Əli Şəmxanini yeni vəzifəyə təyin edib. Tasnim Agentliyinin məlumatına görə, müvafiq sərəncamla Şəmxani İran İslam Respublikasının Müdafiə Şurasının katibi vəzifəsini icra etməyə başlayıb.

Məlumata əsasən, bu təyinat regionda və beynəlxalq müstəvidə təhlükəsizlik sahəsində davam edən gərginliklər və artan risklər fonunda həyata keçirilib. Əli Şəmxani İranın hərbi-siyasi rəhbərliyində ən nüfuzlu fiqurlardan biri hesab olunur. O, uzun illər ərzində ölkənin Ali Milli Təhlükəsizlik Şurasının katibi vəzifəsini tutaraq, strateji qərarların formalaşmasında mühüm rol oynayıb.

Bildirilir ki, Müdafiə Şurasının əsas funksiyalarına dövlətin müdafiə qabiliyyətinin gücləndirilməsi, yeni və asimmetrik təhlükələrə qarşı tədbirlərin hazırlanması, eləcə də müdafiə sahəsində qərarların qəbulu prosesinin əlaqələndirilməsi və təkmilləşdirilməsi daxildir. Analitiklərin fikrincə, Şəmxaninin bu posta gətirilməsi Tehran üçün təhlükəsizlik və müdafiə siyasətində daha mərkəzləşdirilmiş və çevik idarəetmə modelinin qurulmasına yönəlib.

Poliqon.info