Finlandiya prezidenti: Liberal dünya nizamı süqut edir...

Poliqon xəbər verir ki, Finlandiya prezidenti Aleksandr Stubb qlobal siyasətdə II Dünya müharibəsindən sonra formalaşmış liberal, qaydalara əsaslanan dünya nizamının süqut etdiyini bildirib.

Stubb bu fikirləri Foreign Affairs jurnalında dərc olunan məqaləsində səsləndirib. O yazıb ki, dünya hazırda “yeni xaos dövrünə” qədəm qoyub və uzun illər beynəlxalq münasibətlərə əsas vermiş liberal sistem artıq tənəzzül mərhələsindədir. Onun sözlərinə görə, indi çoxqütblü rəqabət şəraitində qaydaların müəyyənləşdirilməsində əsas söz sahibi inkişaf etməkdə olan ölkələr olur.

Finlandiya lideri qeyd edib ki, hazırkı qlobal sistemdə “oportunist sövdələşmələr” beynəlxalq qaydaların qorunmasından daha böyük rol oynamağa başlayıb. Stubb həmçinin “qlobal Qərb, qlobal Şərq və qlobal Cənub” arasında yeni geosiyasi üçbucaq mübarizəsinin formalaşdığını vurğulayıb.

Prezidentin fikrincə, dünyada yaranan bu yeni düzənin konturları qarşıdakı 5–10 il ərzində müəyyən olunacaq və gələcək onilliklər üçün beynəlxalq münasibətlərin strukturunu formalaşdıracaq.

Poliqon.info