Çin iki ölkəni barışdırdı: növbədə Rusiya və Ukraynadır? – Şərh

Rəsmi Pekin bu dəfə daha çətin bir missiyanı üzərinə götürüb. Söhbət Çinin Rusiya-Ukrayna müharibəsinin sonlandırılması və tərəflər arasında sülh müqaviləsinin imzalanması istiqamətində diplomatik fəaliyyətini artırmasından gedir.

Mövzu ilə bağlı Globalinfo.az-a danışan siyasi şərhçi Kənan Novruzov deyib ki, Pekinin sülh planı Kiyevi qane etmir və Ukrayna indi sülh yox, Krım da daxil olmaqla işğal olunmuş bütün torpaqlarını azad etmək, 1991-ci il sərhədlərini bərpa etmək barədə düşünür:

“Bu isə həm də Qərbin Ukraynaya dəstəyinin nəticəsidir. Putin bir neçə dəfə sülhə hazır olduğunu deyib, amma bu, Kremlin sabah sülh müqaviləsini imzalayacağı kimi başa düşülməməlidir. Əks halda tərəflər çoxdan razılığa gəlmiş olardılar. Əslində, indi əsas məsələ sülh müqaviləsi yox, onun şərtləridir. Belə ki, həm Putin, həm də onun ukraynalı həmkarı Zelenski sülh müqaviləsi ehtimalını istisna etmirlər. Amma irəli sürülən şərtlər və tələblər fərqlidir.

Putinin sülhlə bağlı fikirlərində səmimi olduğunu düşünmürəm. Onun sözləri daha çox manipulyasiya xarakterlidir. Kreml rəhbəri, sadəcə, humanist görünmək istəyir.

Sülh perspektivi getdikcə azalır. Döyüşlərin miqyası genişlənir. Üçüncü güclərin müharibədə iştirakı ehtimalı artır. Ukrayna artıq tamamilə ABŞ-dan asılı vəziyyətə düşüb. Rusiya isə tədricən sivil dünyadan tədric olunur. Kreml hərbi-siyasi elitasında ikitərəflilik güclənir. Bütün bunlar onu deməyə əsas verir ki, artıq geriyə yol yoxdur”.

(Turan Rzayev)

Poliqon.info