Böyük Britaniya Qəzza zolağına 27 milyon dollarlıq humanitar yardım ayırıb

Poliqon xəbər verir ki, Böyük Britaniya Qəzza zolağında humanitar vəziyyətin yüngülləşdirilməsi üçün 20 milyon funt sterlinq (təxminən 27 milyon ABŞ dolları) məbləğində yardım paketi ayırıb. Bu barədə ölkənin Baş naziri Kir Starmer Reuters agentliyinə açıqlamasında bildirib.

Yardım paketi əhalinin təmiz suya, sanitariya və gigiyena xidmətlərinə çıxışını təmin etməyə yönəlib. Rəsmi Londondan verilən məlumata görə, maliyyələşdirmə BMT-nin Uşaq Fondu (UNICEF), Ümumdünya Ərzaq Proqramı (WFP) və Norveç Qaçqınlar Şurası (NRC) vasitəsilə həyata keçiriləcək. Yardım aclıq və xəstəlikdən əziyyət çəkən minlərlə Qəzza sakininə çatdırılacaq.

Britaniya hökuməti həmçinin Qəzzanın bərpası məsələlərinə həsr olunmuş üçgünlük beynəlxalq sammitin keçiriləcəyini elan edib. Sammitdə müxtəlif ölkələrin hökumət nümayəndələri, özəl sektor təmsilçiləri və beynəlxalq maliyyə institutlarının, o cümlədən Avropa Yenidənqurma və İnkişaf Bankı (EBRD) və Dünya Bankının nümayəndələri iştirak edəcəklər.

Rəsmi məlumatda qeyd olunur ki, bu maliyyə ilində Böyük Britaniya artıq Fələstinə 74 milyon funt sterlinq həcmində humanitar yardım göstərib. Xatırladaq ki, London sentyabr ayında Fələstini rəsmi şəkildə dövlət kimi tanımışdı.

Kir Starmer hazırda Misirdə keçirilən və Qəzza münaqişəsinin yekun mərhələsinin müzakirəsinə həsr olunan dünya liderləri sammitində iştirak edir. Sammitin əsas məqsədi bölgədə atəşkəsin qorunması, mülki əhalinin müdafiəsi və bərpa proqramının maliyyələşmə mexanizmlərinin razılaşdırılmasıdır.

Poliqon.info